Mumbai Goa Highway

गोव्यातून सिंधुदुर्गात जाणाऱ्या राष्ट्रीय महामार्ग ६६ (NH66) वर सकाळी संरक्षक भिंत कोसळ्याची एक घटना उघडकीस आली. यावेळी महामार्गावरुन चारचाकीतून प्रवास करणारे एक कुटुंब थोडक्यात बचावले आहे. शनिवारी (दि.२२ जून) सकाळी साडे दहा वाजता ही घटना घडली.

मिळालेल्या माहितीनुसार, गोवा-मुंबई महामार्गावर (Mumbai Goa Highway) पेडण्यातून सिंधुदुर्गात जाण्यासाठी मालपे येथे नवा मार्ग काही महिन्यांपूर्वी खूला करण्यात आला आहे. जुना मार्ग खराब झाल्याने नवा मार्ग तात्काळ खुला करण्यात आला. रस्ताच्या दोन्ही बाजुला असणारे माती आणि चिऱ्यांचे ढीगारे थोपविण्यासाठी संरक्षक भिंत उभारण्यात आली आहे.

दरम्यान, पावसाळा सुरु झाल्यापासून माती व चिऱ्यांचे ढीले झालेले ढीगाऱ्यांचा संरक्षक भिंतीवर ताण येऊन ती कोसळण्याची भीती व्यक्त केली जात होती. याबाबत विविध वृत्तवाहिन्यांनी वृत्त देखील प्रसारित केले होते.

ही भीती आज सकाळी खरी ठरली असून, साडे दहा वाजता माती व चिऱ्यांचे ढीगारे संरक्षक भिंतीवर कोसळले आणि भिंत तूटली. याचवेळी महामार्गावरुन प्रवास करणाऱ्या चारचाकीतील एक कुंटुब थोडक्यात बचावले. (Retaining Wall Collapsed At Pernem, Goa)