Goa Public Service Commission: गोवा सरकारी तंत्रनिकेतनच्या प्राचार्य पदासाठी समर्थ भगीरथ बोरकर यांची गोवा लोकसेवा आयोगाने केलेली निवड व शिफारस मुंबई उच्च न्यायालयाच्या गोवा खंडपीठाने रद्दबातल ठरवत आयोगाला दणका दिला आहे.

याचिकादार प्रमोदिनी एस. नाईक ऊर्फ प्रमोदिनी गावकर या प्रतीक्षा यादीत एकमेव उमेदवार असल्याने त्यांची शिफारस आयोगाने करावी,सरकारने तीन महिन्यांत त्यावर निर्णय घ्यावा, असे निर्देश देत ही याचिका निकालात काढली.

गोवा सरकारी तंत्रनिकेतन प्राचार्य पदासाठी आवश्‍यक पात्रता समर्थ बोरकर यांच्याकडे अर्ज सादर करण्याच्या शेवटच्या दिवशी नसल्याने आयोगाने त्यांची निवड व शिफारस सरकारला करण्याची गरज नव्हती. आयोगाने त्यांची शिफारस केली तरी त्यांची नियुक्ती केली नाही.

परीक्षेत याचिकादाराला गुण कमी असल्याने समर्थ यांची शिफारस केली होती. प्राचार्यपदी नियुक्ती नसल्याने सरकार अजूनही याचिकादाराचा या पदासाठी विचार करू शकते, असे निरीक्षण न्यायालयाने नोंदले आहे. याचिकादारातर्फे ॲड. डिसा यांनी तर सरकारतर्फे एजी.देविदास पांगम यांनी बाजू मांडली.