सासष्टी: सध्या मासेमारी बंदी असल्याने अनेक मासेमारी बोटमालकांनी राशोल येथील नदीत बेकायदेशीरपणे आपल्या बोटी आणून ठेवल्या आहेत. या ७० ते ८० बोटींमुळे व त्यावरील मजुरांमुळे राशोल गावात भीतीचे वातावरण आहे.

शुक्रवारी (ता.१८) गोवा किनारी क्षेत्र व्यवस्थापन प्रशासनाच्या (जीसीझेडएमए) अधिकाऱ्यांनी येथे पाहणी केली व या बोटमालकांवर कारवाई करण्याचे आश्वासन दिले आहे. येथे बोटी ठेवण्यास त्यांच्याकडे कोणतीही परवानगी नाही.

हे सीआरझेड नियमांचे उल्लंघन आहे. स्थानिक पंचायतीकडूनही परवानगी दिलेली नाही. बोटमालकांना नोटीस पाठवली जाईल व चौकशी केली जाईल, असे ‘सीआरझेड’ अधिकाऱ्यांनी आश्वासन दिल्याचे राशोल पंचायतीचे सरपंच जोसेफ वाझ यांनी पत्रकारांना सांगितले.

अनेक समस्यांमुळे हैराण!

आम्ही या बेकायदेशीरपणे ठेवलेल्या बोटींसंदर्भात कॅप्टन ऑफ पोर्ट, सीआरझेड, मत्स्यव्यवसाय खाते, आरोग्य खात्याकडे तक्रारी केल्या. जिथे बोटी ठेवलेल्या आहेत तेथे ओहोटीच्या वेळी माती येऊन एकवटते व ही माती नंतर शेतजमिनीत जाते. आम्ही दर आठ दिवसांनी मजुरांकरवी ही माती काढताे.

या नदीच्या काठावर असलेल्या फुटबॉल मैदानाचीही त्यामुळे वाट लागलेली आहे. मजुरांसाठी येणारे ट्रक मैदानावर ठेवले जातात. शिवाय या मजुरांमुळे डेंग्यू, मलेरिया किंवा इतर रोगांचा प्रदुर्भाव होण्याची शक्यता असल्याने स्थानिक या परिसरात येत नाहीत, असेही सरपंच वाझ यांनी सांगितले.