पणजी: पूर्ण पाच वर्षांचा कार्यकाळ सभापतीपदावर राहून या पदाची शान मला आणखी वाढवायची होती. पण, पक्षाच्या आदेशामुळे जड मनाने या पदाचा राजीनामा देत आहे, अशी भावुक प्रतिक्रिया रमेश तवडकर यांनी राजीनामा दिल्यानंतर पत्रकारांशी बोलताना दिली.
सभापती रमेश तवडकर हे दिगंबर कामत यांच्यासह गुरुवारीच शपथ घेणार, हे आधीच निश्चित झाले होते. त्यानुसार तवडकर यांनी गुरुवारी सकाळी विधानसभेत जाऊन सचिव नम्रता उल्मन यांच्याकडे आपल्या पदाचा राजीनामा सादर केला. त्यानंतर पत्रकारांशी बोलताना ते म्हणाले, २९ मार्च २०२२ रोजी आपण सभापतिपदाची
शपथ घेतली. तेव्हाच या पदाला पूर्णपणे न्याय देण्याचे आपण ठरवले होते आणि गेल्या साडेतीन वर्षांत ते करून दाखवले. या काळात सत्ताधारी-विरोधी आमदारांसह विधानसभेतील सर्व कर्मचारी माझ्या कुटुंबाचा भाग बनले होते.
त्यांच्यासह गोमंतकीय जनतेनेही आपल्याला विधानसभा आणि विधानसभेबाहेरही सन्मान दिला, याचा आपल्याला गर्व वाटतो.
पूर्ण पाच वर्षे सभापतिपदावर राहून या पदाची शान आपल्याला आणखी वाढवायची होती. पण, पक्षाचे पुढील काळातील भवितव्य तसेच आगामी विधानसभा निवडणूक डोळ्यांसमोर ठेवून पक्ष नेतृत्वाने आपल्याकडे मंत्रिपदाची जबाबदारी सोपवली. त्यामुळे जड मनाने या पदाचा राजीनामा द्यावा लागत आहे. पुढील काळात पक्षाने दिलेल्या मंत्रिपदाच्या जबाबदारीलाही आपण पूर्णपणे न्याय देईन, असा ठाम विश्वासही तवडकर यांनी व्यक्त केला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.