Rama Kankonkar assault case: करंजाळे येथील सामाजिक कार्यकर्ते रमा काणकोणकर यांच्यावरील हल्ला प्रकरणाच्या तपासात आता 'जात पडताळणी' हा महत्त्वाचा मुद्दा बनला आहे. या प्रकरणात पणजी पोलिसांनी मेरशी येथील सत्र न्यायालयात आरोपपत्र सादर केले आहे, मात्र 'जात प्रमाणपत्रा'ची पडताळणी करण्यासाठी पोलिसांनी पुढील तपासासाठी मुदतवाढ मागितली आहे.

'राजकारण्यांचीही चौकशी करा!'

या सर्व घडामोडींच्या पार्श्वभूमीवर रमा काणकोणकर यांनी स्वतः महत्त्वपूर्ण विधान केले आहे. त्यांनी सांगितले की, त्यांच्यावर अत्याचार प्रतिबंधक कलम तेव्हाच जोडले गेले, जेव्हा त्यांची जात पडताळणी दोन महिन्यांपूर्वी पूर्ण झाली.

काणकोणकर म्हणाले की, "प्रत्येक टप्प्यावर, प्रत्येक प्रश्नावर आणि कागदपत्रांच्या बाबतीत मी पूर्ण सहकार्य केले." आणि असे म्हणत त्यांनी मागणी केली की, "माझ्यावरील हल्ल्यात ज्या दोन राजकारण्यांवर मी संशय व्यक्त केला आहे, त्यांचीही पडताळणी आणि चौकशी तेवढ्याच गांभीर्याने करावी." या मागणीमुळे या प्रकरणाला आता पुन्हा एकदा राजकीय वळण लागण्याची शक्यता असून, पोलीस तपास आणि न्यायालयाच्या पुढील निर्णयाकडे सर्वांचे लक्ष लागले आहे.

'अत्याचार प्रतिबंधक कलम' जोडण्यासाठी पडताळणी आवश्यक

पोलिसांनी न्यायालयाला सांगितले की, या हल्ल्यात जातिवाचक उल्लेख केल्याचा आरोप असल्याने, 'अनुसूचित जाती/जमाती अत्याचार प्रतिबंधक कायदा' (SC/ST Act) अंतर्गत कलम लागू होणार की नाही, हे निश्चित करण्यासाठी पीडित रमा काणकोणकर यांनी सादर केलेल्या जात प्रमाणपत्राची चाचपणी करणे अत्यंत आवश्यक आहे.दरम्यान, हल्ल्यातील आरोपी जेनिटो कार्दोज याच्या जामीन अर्जावरील सुनावणी २६ नोव्हेंबर रोजी ठेवण्यात आली आहे.