पणजी: करंझाळे येथे झालेल्या प्राणघातक हल्ल्यानंतर उपचार घेत असलेल्या रामा काणकोणकर यांचा जबाब पोलिसांनी काल रात्री (१५ व्या दिवशी) नोंदविला. आपल्या जबानीत काणकोणकर यांनी "मिंगेल आरावजो माझा पाठलाग करत होता. तसेच मारहाण करताना हल्लेखोरांनी मला 'गावडा' व 'राखणदार' असे संबोधले,' असे त्यांनी सांगितल्याची माहिती मिळाली आहे.

वरिष्ठ पोलिस अधिकाऱ्यांनी माहिती देताना सांगितले की, काणकोणकर यांच्या जबानीत नोंदविलेल्या तथ्यांची सध्या पडताळणी सुरू असून तपास प्रलंबित असल्याने त्यातील अधिक तपशील सध्या उघड करणे उचित नाही.

या प्रकरणी पोलिसांनी आत्तापर्यंत आठ संशयितांना अटक केली असून सर्व संशयित सध्या कोलवाळ कारागृहात न्यायालयीन कोठडीत आहेत. त्यांना १० ऑक्टोबर रोजी सत्र न्यायालयात हजर करण्यात येणार आहे

रामाच्या उपचारासाठी विशेष समिती

राणे आरोग्यमंत्री विश्वजीत राणे यांनी आज गोवा वैद्यकीय महाविद्यालयात विभाग प्रमुख, अधिष्ठाता आणि अधीक्षकांची बैठक घेऊन काणकोणकर यांच्या उपचारांची माहिती घेतली. त्यांनी रुग्णालयात जाऊन रामा काणकोणकर यांचीही भेट घेतली.

रामाच्या उपचारासाठी विशेष समिती स्थापन केली असून सरकार त्यांना सर्वोत्तम वैद्यकीय सेवा मिळावी यासाठी कटिबद्ध आहे, असे राणे यांनी सांगितले