पणजी: राज्यात आयोजित केल्या जाणाऱ्या पार्ट्यांत अमलीपदार्थांचा वापर होत असल्याचा आणखीन एक पुरावा समोर आला आहे. रायपूर पोलिसांनी अटक केलेल्या दोन महिलांनी गोव्यातील पार्ट्यांत अमलीपदार्थ वापरण्यात आले होते अशी कबुली तेथील पोलिसांना दिली आहे.

सुत्रांनी दिलेल्या माहितीनुसार, रायपूरमध्ये गोव्याशी संबंधित अमलीपदार्थ व्यापाराचा मोठा खुलासा झाला असून पोलिसांनी नव्या मलिक आणि विधी अग्रवाल या दोन महिलांना अटक केली आहे. चौकशीत या दोघींनी गोव्यात आयोजित होणाऱ्या टेक्नो पार्ट्यांमध्ये अमलीपदार्थांचा वापर केल्याची कबुली दिली आहे.

पोलिसांच्या माहितीनुसार, या दोन्ही महिला दरमहा गोव्यात व मुंबईत जात असून तेथील हॉटेल, क्लब, रिसॉर्ट आणि फार्महाउसवर पार्ट्यांचे आयोजन करत असतात. या पार्ट्यांमध्ये मोठ्या प्रमाणावर तरुणांचा सहभाग होत असल्याचेही उघड झाले आहे. विशेष म्हणजे, विधी अग्रवाल ही स्वतःच्या इव्हेंट कंपनीच्या माध्यमातून या पार्ट्यांचे आयोजन करीत होती.

ड्रग्ज रॅकेटचा पोलिसांकडून शोध सुरू

राज्यातील विविध ठिकाणच्या गावांबाहेरील परिसरातील फार्म हाउसवर होणाऱ्या पार्ट्यांमध्ये अश्लील कृत्यांनाही वाव दिला जात असल्याचे पोलिस तपासात स्पष्ट झाले आहे. या प्रकरणाचा पुढील तपास सुरू असून पोलिसांकडून ड्रग्ज रॅकेटशी संबंधित आणखी धागेदोरे शोधले जात आहेत.