केपे : काल रात्रीपासून पावसाने जोरदार हजेरी लावली असल्याने केपे तसेच कुडचडे भागात बऱ्याच ठिकाणी पाणी रस्त्यावरून वाहू लागले आहे तसेच घरात पाणी शिरण्याचे प्रकार घडले आहेत. गुडी पारोडा येथे ग्रासीयस कुटुंबियांच्या घरामध्ये पाणी शिरले आहे.

काल रात्रीपासून पडत असलेल्या पावसामुळे गुडी पारोडा येथील ग्रासियस कुटुंबियांच्या घरात रात्री पाणी शिरल्याने त्यांना आपल्या मुलांबाळासह रात्र जागून काढावी लागल्याचे जॉकीना ग्रासियस यांनी सांगितले.

काल रात्रीच याची संबंधित खात्याच्या अधिकाऱ्यांना याची माहिती दिली होती पण दुपारी एक पर्यंत कुणीच अधिकारी आले नसल्याने लोकांनी संताप व्यक्त केला.

गेल्या तीन वर्षांपासून सदर पाणी घरात शिरण्याचे प्रकार घडत असल्याने याविषयी स्थानिक पंचायत तसेच संबंधित खात्याच्या कार्यालयात तक्रार दाखल केली होती पण अध्याप या तक्रारीकडे कानाडोळा करण्यात आल्याचे त्यांनी सांगितले.

स्थानिक लोकांनी दिलेल्या माहितीनुसार पूर्वी या घरात पाणी शिरत नव्हते पण एका स्थानिक युवकाने ग्रासियस कुटुंबियांच्या घरामागून वाहत येणाऱ्या पाण्याची वाट अडवल्याने पाणी त्यांच्या घरात शिरत असल्याचे सांगितले

गेल्या वर्षी असेच पाणी भरले होते व यावेळी पोलिसांच्या सहकार्याने पाणी जाण्याची वाट मोकळी करण्यात आली होती पण नंतर सदर वाट परत एकदा दगडी चिरे लावून बंद केल्याने ही स्थती निर्माण झाल्याचे लोकांनी सांगितले.

स्थानिक पंचायत व संबंधित खात्याच्या अधिकाऱ्यांनी ज्या लोकांनी पाणी जाण्याची बंद केली आहे ती त्वरित मोकळी करून द्यावी व आम्हाला न्याय ध्यावा अशी मागणी ग्रासियस कुटुंबीयांनी केली आहे.