पणजी: गोव्यात पावसाने जोरदार हजेरी लावत राजधानी पणजीसह डिचोली, साखळी आणि वाळपईला पावसाने झोडपले आहे. गोवा हवामान विभागाने दोन दिवसांसाठी (२०, २१ मे) ऑरेंज अलर्ट दिला असून, पाच दिवसांसाठी यलो अलर्ट जारी केला आहे. आज (मंगळवार) राज्यात मुसळधार पावसाची शक्यता वर्तविण्यात आली आहे.

राज्यात दुपारपासून पावसाचे ढग दिसत होते. ढगांच्या गडगडाटासह डिचोली, साखळी, पणजी, पर्वरी, वाळपईत पावसाने जोरदार हजेरी लावली. अचानक आलेल्या पावसामुळे नागरिकांची तारांबळ उडाली. विविध ठिकाणी पावसामुळे रस्त्यावर पाणी साचले आहे. पाण्यातून वाट काढताना वाहन चालक आणि नागरिकांना कसरत करावी लागतेय.

गोवा हवामान विभागाने दिलेल्या माहितीनुसार, मंगळवारी राज्यात वादळी वाऱ्यासह मुसळधार पावसाची शक्यता वर्तविण्यात आली आहे. उत्तर आणि दक्षिण जिल्ह्यात ५० ते ६० किलोमीटर प्रतितास वेगाने वारे वाहण्याची शक्यता हवामान खात्याने वर्तवली आहे.

दोन दिवस ऑरेंज, पाच दिवस यलो अलर्ट

हवामान खात्याने राज्याते आज आणि उद्या (२०, २१ मे) ऑरेंज अलर्ट जारी करण्यात आला असून, २२ ते २६ मे (पाच दिवस) यलो अलर्ट जारी करण्यात आला आहे. यादिवसांत राज्यात वादळ वाऱ्यासह मुसळधार पावसाचा अंदाज हवामान खात्याने वर्तवला आहे.

या काळात नागरिकांना खुल्या भागात, झाडे कोसळण्याची शक्यता असलेल्या भागात काम करण्याचे टाळावे, असे आवाहन हवामान विभागाच्या वतीने करण्यात आले आहे. इलेक्ट्रिक पोल, धोकादायक इमारती, पाणी साचण्याची शक्यता असणारी ठिकाणे यापासून दूर राहण्याचे आवाहन देखील विभागाने केले आहे.