पाटणा: काँग्रेस नेते व लोकसभेतील विरोधी पक्षनेते राहुल गांधींनी निवडणूक आयोगावर नवा आरोप करताना असा दावा केला, की बिहारच्या मसुदा मतदारयाद्यांमध्ये गया जिल्ह्यातील संपूर्ण गावच एका घरात राहत असल्याचे दाखवले गेले आहे.

काँग्रेसने ‘एक्स’वर केलेल्या पोस्टमध्ये नमूद केले आहे, की गया जिल्ह्यातील बारा चट्टी विधानसभा मतदारसंघातील निदानी गावात एका मतदान केंद्रावरील सर्व ९४७ मतदार ‘घर क्रमांक सहा’चे रहिवासी असल्याचे दाखवण्यात आले आहे.

काँग्रेसने नमूद केले, की हा प्रकार फक्त एका गावाबाबत असेल तर मग राज्य आणि राष्ट्रीय स्तरावर किती मोठ्या प्रमाणात अनियमितता असू शकते याची आपण फक्त कल्पनाच करू शकतो.

दरम्यान, बिहारच्या मुख्य निवडणूक अधिकाऱ्यांच्या कार्यालयाने याबाबत स्पष्टीकरण दिले आहे. गया जिल्हाधिकाऱ्यांच्या ‘एक्स’ खात्यावर याबाबत एक पोस्ट प्रसिद्ध केली. त्यात स्पष्ट केले आहे, की ज्या गावांमध्ये किंवा झोपडपट्टी वस्त्यांमध्ये घरांना प्रत्यक्ष मालिका क्रमांक नसतात, तिथे ‘काल्पनिक/नाममात्र घर क्रमांक’ देण्यात येतो.

मुदतवाढीसंदर्भात सुनावणीस मान्यता

बिहारमधील निवडणूक तोंडावर असताना मतदारयादीच्या फेरपडताळणी मोहिमेसंदर्भात दावे अन् आक्षेप दाखल करण्याच्या अंतिम मुदतीत वाढ करण्याच्या राष्ट्रीय जनता दल (राजद) आणि आणि ‘एआयएमआयएम’ या पक्षांच्या मागण्यांवर सर्वोच्च न्यायालयाने शुक्रवारी सहमती दर्शवली. आता या अर्जांवर १ सप्टेंबरला सुनावणी होणार आहे.

राहुल गांधींनी माफी मागावी

‘‘पंतप्रधान नरेंद्र मोदी अन् त्यांच्या दिवंगत मातुःश्रीविषयी बिहारमध्ये काढण्यात आलेल्या ‘वोटर अधिकार यात्रे’दरम्यान अपशब्द वापरण्यात आले. त्याबद्दल काँग्रेसचे नेते राहुल गांधी यांनी माफी मागितली पाहिजे,’’ अशी मागणी केंद्रीय गृहमंत्री अमित शहा यांनी केली.