पणजी: गोव्यात उद्या सकाळी 8 वाजता मतमोजणीला सुरुवात होईल. गोवेकरांनी कोणत्या राजकीय पक्षाला पसंती दिली आहे हे उद्या दुपार पर्यंत स्पष्ट होईल, असे निवडणूक अधिकाऱ्यांचे म्हणणे आहे. निकालाआधीच कॉंग्रेस आणि भाजप मधील मुख्यमंत्री पदासाठी इच्छुक उमेदवार दिल्ली दौऱ्यावर जाऊन आले आहेत.

मुख्यमंत्री आणि भाजप नेते प्रमोद सावंत मंगळवारी दिल्ली दौऱ्यावर होते. दौऱ्यादरम्यान सावंत यांनी पंतप्रधान नरेंद्र मोदी (Narendra Modi) यांची भेट घेतली. भेटीनंतर सावंत म्हणाले, "मला विश्वास आहे की गोवेकर मला पुन्हा एकदा सेवेची संधी देतील."

गोवा कॉंग्रेसच्या वतीने मायकाल लोबो यांनी दिल्लीला जाऊन राहुल गांधी यांची भेट घेतली. कॉंग्रेस मधून दिगंबर कामत (Digambar Kamat) आणि मायकल लोबो मुख्यमंत्री पदाच्या शर्यतीत असल्याचे बोलले जात आहे.

एक्झिट पोल भाजपला अनुकूल नाहीत
एकाही एक्झिट पोलनमध्ये भाजपला बहुमत मिळताना दिसत नाही. ही आकडेवारी खरी ठरल्यास भाजपला (BJP) सत्तास्थापनेसाठी युती शिवाय पर्याय नाही. महाराष्ट्रवादी गोमंतक पार्टीचे सुदिन ढवळीकर यांनी प्रमोद सावंत यांना मुख्यमंत्री म्हणून पाठिंबा देण्यास नकार दिला आहे. आरोग्य मंत्री विश्वजित राणे देखील मुख्यमंत्री पदासाठी इच्छुक असल्याचे बोलले जात आहे.