मडगाव: औद्योगिक वसाहत उभारण्याच्या इराद्याने १५ वर्षांपूर्वी औद्योगिक विकास महामंडळाने संपादित केलेल्या किटल बेतूल पठारावर आता मे. स्कायडायविंग एडवेंचर्स या कंपनीला एरो स्पोर्ट्स प्रकल्प उभारण्याची परवानगी दिल्याने स्थानिकांमध्ये शंकेचे वातावरण तयार झाले आहे. हा निर्णय घेताना स्थानिक पंचायत तसेच स्थानिक आमदार एल्टन डिकॉस्टा यांना पूर्णतः अंधारात ठेवण्यात आल्याने लोकांमध्ये चिंता निर्माण झाली आहे.

गोवा इन्व्हेस्टमेंट प्रमोशन बोर्डच्या हल्लीच झालेल्या बैठकीत या प्रकल्पाला मान्यता देण्यात आली आहे. २.४५ लाख चौरस मीटर जागेत हा प्रकल्प येत आहे. हा प्रकल्प सुरू झाल्यानंतर पाच वर्षांच्या काळात एकूण ३०३ जणांना रोजगार प्राप्त होणार त्यापैकी ६१ टक्के म्हणजे १८३ नोकऱ्या स्थानिकांना तर ११८ नोकऱ्या बिगर गोमंतकीयांसाठी ठेवण्यात येणार असल्याचे या प्रकल्पाच्या अहवालात म्हटले आहे.

या संदर्भात स्थानिक आमदार एल्टन डिकॉस्टा यांना विचारले असता, प्रकल्पासंदर्भात मला किंवा स्थानिक पंचायतीला काहीच माहिती नाही. या प्रकल्पाचे स्वरूप काय आहे तेही मला माहीत नाही असे ते म्हणाले. या प्रकल्पाचे नेमके स्वरूप समजून घेण्यासाठी मी पंचायत सदस्यांसह मुख्यमंत्री प्रमोद सावंत यांची भेट घेणार आहे.

हा प्रकल्प चांगला असेल आणि स्थानिकांच्या फायद्याचा असेल तर तो सुरू होण्यास आमची काही हरकत नाही. मात्र, त्याचा फायदा केपे मतदारसंघाला होणार नसेल तर आमचा या प्रकल्पाला विरोध असेल, असेही डिकॉस्टा यांनी सांगितले.