Quepem Municipality: केपेच्या नगराध्यक्षा सुचिता शिरवईकर यांनी पदाचा गैरवापर करून आपल्याच मुलाला पालिकेत कामावर घेतल्याने त्यांना अपात्र करण्याचे लेखी निवेदन नगरपालिका संचालकांना दिले असल्याचे नगरसेवक अमोल काणेकर यांनी पत्रकार पारिषदेत सांगितले.

केपे पालिकेत घेतलेल्या पत्रकार परिषदेत नगरसेवक लुर्डस फर्नांडिस, आलिंदा लासेर्दा ज्योकिना डायस आणि आंजेलिस्ट डिकॉस्ता उपस्थित होते. नगराध्यक्षा शिरवईकर या केपे पालिका त्यांच्या मालकीची असल्यासारखे निर्णय घेत आहेत.

पालिका मंडळाला विश्वासात न घेताच आपला मुलगा भुतेश शिरवईकर याला एमटीएस स्टाफ म्हणून नियुक्त केल्याचे काणेकर यांनी सांगितले. केपे पालिकेच्या कनिष्ठ कारकुनाने राजीनामा दिला होता.

ती जागा भरण्यासाठी कुणालाही विश्वासात न घेता भुतेश याची नेमणूक केली. ही नियुक्ती कोणत्या आधारावर केली, असा प्रश्न त्यांनी उपस्थित केला. ज्यावेळी भुतेश यांना कामावर घेतले होते, त्या चार दिवसांत सुचिता रजेवर गेल्या होत्या. त्या मुद्दाम रजेवर गेल्याचे सिद्ध झाले आहे, असे त्यांनी सांगितले.