Goa News : मोरजी, पेडणे तालुक्याचा जमीन आराखडा नागरिक किंवा स्थानिक आमदारांना विश्वासात न घेता सरकारने लादला आहे. पेडणे तालुक्याच्या जमीन आराखड्यात झोन बदल केलेला आहे.

तो अमान्य असून ५ ऑक्टोबरपूर्वी पेडणे नगर नियोजन कार्यालयात हा आराखडा उपलब्ध करावा. तिथे आम्ही हरकती, दावे सादर करू, अन्यथा ६ ऑक्टोबर रोजी चोपडे शिवोली पुलावर रास्ता रोको करू,

असा इशारा पेडणेवासीयांनी मांद्रेचे आमदार जीत आरोलकर यांना निवेदन दिल्यानंतर दिला.

आरोलकर यांची मांद्रे कार्यालयात राजन कोरगावकर,सदानंद वायंगणकर ,फ्रान्सिस फर्नांडिस, साईनाथ आपुले, स्वप्निल शेर्लेकर तुषार शेट गावकर ,हरी म्हामल, जगन्नाथ पार्सेकर, संदेश सावंत,शिवकुमार आरोलकर, अँथनी फर्नांडिस, हेमंत चोपडेकर. दयानंद मांजरेकर यांनी भेट घेतली.

जमीन आराखडा तयार करताना सरकारने आपल्यालाही विश्वासात घेतलेले नाही. जनतेला आराखडा नको, तर तो रद्द करण्यासाठी आपणही प्रयत्नशील राहू.

सरकारचा घटक असलो तरी ज्या जनतेने निवडून दिले त्यांचे हित जपणे, आपले प्रमुख कर्तव्य आहे.

-जीत आरोलकर, आमदार, मांद्रे मतदारसंघ