Bicholim Fire station: गेल्या साडेचार वर्षाहून अधिक काळ रखडलेल्या शहरातील ‘मॉर्डन फायर स्टेशन’ (अत्याधुनिक अग्निशमन दल केंद्र) प्रकल्पाच्या कामाला आता नव्याने चालना देण्यात आली आहे. साडेचार वर्षांपूर्वी पायाभरणी करण्यात आलेला हा प्रकल्प वेगवेगळ्या कारणांमुळे रखडत गेला. मध्यंतरी कंत्राटदाराने काम सोडूनही दिले.

आता या प्रकल्पासाठी नव्याने निविदा काढून दुसऱ्या कंत्राटदारामार्फत प्रकल्पाचे काम हाती घेण्यात आले आहे. या प्रकल्पाची आता पूर्तता होणार असल्याचा विश्वासही डिचोलीचे आमदार डॉ. चंद्रकांत शेट्ये यांना आहे.

१६ जानेवारी २०१९ या दिवशी विद्यमान मुख्यमंत्री आणि तत्कालीन सभापती डॉ.प्रमोद सावंत यांच्या हस्ते या महत्वाकांक्षी प्रकल्पाची पायाभरणी करण्यात आली होती. पायाभरणी केल्यानंतर मात्र या प्रकल्पाला एक-एक ग्रहण लागत गेले. पायाभरणी नंतर लगेचच लोकसभा निवडणुकीची आचारसंहिता लागू झाली आणि या प्रकल्पाच्या बांधकामात अडथळा निर्माण झाला. त्यानंतर सहा महिन्यांनी या प्रकल्पाच्या कामाला चालना मिळाली. काम चालू असतानाच, अडीच वर्षापूर्वी या प्रकल्पाला ‘कोविड’ ची पनवती लागली.

महामारीच्या शिरकावानंतर लागू झालेली टाळेबंदी आणि नंतर राज्याबाहेरील मजुरांनी गावचा रस्ता धरल्याने प्रकल्पाच्या कामाला ‘ब्रेक’ लागला. टाळेबंदीनंतर प्रकल्पाच्या कामाला पुन्हा सुरवात झाली.तरी महामारीचे संकट आणि अपुरा कामगारवर्ग यामुळे प्रकल्पाचे काम पुन्हा रेंगाळत गेले. गेल्या वर्षीपासून तर प्रकल्पाचे काम बंदच होतेच. या प्रकल्पाचे ४० टक्केही काम झाले नव्हते. यामुळे या महत्वकांक्षी प्रकल्पाचे भवितव्य अधांतरी बनले होते. या प्रकल्पाची पूर्तता कधी होणार त्याबाबतही साशंकता निर्माण झाली होती.

प्रकल्प खर्च वाढण्याची शक्यता

गोवा राज्य साधनसुविधा विकास महामंडळातर्फे येथील आयडीसी परिसरात हा प्रकल्प उभारण्यात येत आहे. या प्रकल्पासाठी ५ हजार ४७९ चौरस मीटर जमीन संपादित करण्यात आली असली, तरी २ हजार ४८० चौरस मीटर जागेत प्रकल्पाचे बांधकाम करण्यात येणार आहे. प्रकल्पाचा सुरवातीचा अंदाजित खर्च ११.२८ कोटी असला, तरी काम लांबणीवर पडल्याने हा खर्च आता वाढण्याची शक्यता आहे.