CCTV Camera: मुळगाव बगलमार्गावर सीसीटीव्ही कॅमेरे बसविण्याचा प्रस्ताव : सरपंच तृप्ती गाड

CCTV Camera: मुळगावहून दोडामार्गच्या दिशेने जाणाऱ्या बगलमार्गावर कचऱ्याची समस्या दिवसेंदिवस भयानक बनत चालली आहे. ही समस्या नियंत्रणात आणण्यासाठी बगलमार्गावर सीसीटिव्ही कॅमेरे बसविण्याचा पंचायतीचा प्रस्ताव आहे, अशी माहिती मुळगावच्या सरपंच तृप्ती गाड यांनी दिली.

कचरा टाकताना कोणी आढळल्यास त्याच्या विरोधात दंडात्मक कारवाई करण्यात येईल. कचरा टाकणाऱ्यांना पाच हजार रुपयांपर्यंत दंड देण्याचा पंचायतीचा विचार चालू आहे, असेही सरपंच गाड यांनी सांगितले.

पंचायतीतर्फे दारोदारी कचऱ्याची उचल करण्यात येत आहे. अधूनमधून स्वच्छता मोहीमही राबविण्यात येत आहे. तरीदेखील कचरा काही पंचायतींची पाठ सोडत नाही. काही ठरावीक भागात तर कचरा टाकण्याचे प्रकार चालूच आहेत. कचरा टाकणाऱ्यांच्या या वृत्तीमुळे पंचायत पुरती हतबल झाली आहे.

असे सरपंच गाड यांनी सांगितले. तसेच गावाला कचरामुक्तीसाठी जनतेनेही सहकार्य करावे, असे आवाहन सरपंचांनी केले आहे.

अस्ताव्यस्त कचरा

मुळगाव-दोडामार्ग रस्त्यावर कचऱ्याची समस्या मोठी गंभीर आहे. सध्या या बगलमार्गाला कचऱ्याचे ग्रहण लागले आहे. या मार्गावर सुका आणि ओला मिळून प्रचंड प्रमाणात कचरा रस्त्यावर अस्ताव्यस्त पसरलेला आहे. या कचऱ्यामुळे बगलमार्गावर सध्या विदारक चित्र दिसून येते. हा कचरा कोठून येतोय, त्याबद्दल प्रश्नचिन्ह निर्माण झाले असले, तरी या बगलमार्गावरून ये-जा करणारे हा कचरा टाकतात, असा पंचायतीला संशय आहे.