Goa Electricity: वीज क्षेत्रात राज्याला स्वयंपूर्ण बनवू

Goa Electricity: राज्याच्या विकासासाठी पंतप्रधान नरेंद्र मोदी यांचे भक्कम सहकार्य मिळत आहे. त्यांच्याच सहकार्यामुळे वीज क्षेत्रात राज्याला स्वयंपूर्ण बनविणे हा सरकारचा संकल्प आहे. या संकल्पाची पूर्तता होण्यासाठी गावागावांत सौरऊर्जा निर्मितीसारखे प्रकल्प उभे राहणे ही काळाची गरज आहे.

सौरऊर्जा प्रकल्प फायदेशीर ठरतानाच, त्यापासून रोजगाराची संधीही उपलब्ध होणार आहे, असे मत मुख्यमंत्री डॉ. सावंत यांनी मांडले.

मये मतदारसंघातील कारापूर-सर्वण पंचायत क्षेत्रात भूमिगत वीजवाहिन्या घालण्याच्या कामाचा शुभारंभ केल्यानंतर मुख्यमंत्री डॉ. प्रमोद सावंत बोलत होते. कारापूर येथे रविवारी (ता.१५) पार पडलेल्या या सोहळ्याप्रसंगी वीजमंत्री सुदिन ढवळीकर यांच्यासह मयेचे आमदार प्रेमेंद्र शेट उपस्थित होते.

अन्य मान्यवरांत वीज खात्याचे संचालक स्टिफन फर्नांडिस, कार्यकारी अभियंता वल्लभ सामंत, जिल्हा पंचायत सदस्य महेश सावंत, शंकर चोडणकर, कारापूरचे सरपंच दत्तप्रसाद खारकाडे आणि तन्वी सावंत यांचा समावेश होता. कारापूर-सर्वण पंचायत क्षेत्रात ११ केव्ही भूमिगत वीज केबल घालण्याच्या या प्रकल्पावर १९.५ कोटी खर्च येणार आहे. एकूण २४ किलोमीटर अंतर व्यापले जाणार आहे.

प्रेमेंद्र शेट यांनी यावेळी सरकारच्या सहकार्यामुळे मये मतदारसंघातील वीज समस्या कायमची सुटणार, असा विश्वास व्यक्त करून विकासकामांसाठी नागरिकांच्या सहकार्याची गरज असल्याचे सांगितले. स्टिफन फर्नांडिस यांनीही वीज खात्याच्या प्रगतीचा थोडक्यात आढावा घेतला. वल्लभ सामंत यांनी स्वागत केले. विठ्ठल शिरोडकर यांनी सूत्रसंचालन केले.

केंद्र सरकारचे सहकार्य

वीज क्षेत्रात साधनसुविधा उभारण्यासाठी राज्याच्या इतिहासात प्रथमच केंद्र सरकारकडून २८९ कोटींचा निधी उपलब्ध झाला आहे. पंतप्रधान नरेंद्र मोदी यांच्यामुळेच हे शक्य झाले आहे. त्याबद्दल पंतप्रधानांचे अभिनंदन करतो. यामुळे या निधीतून राज्यात ज्या भागात वीजसमस्या आहेत त्या भागाचा विकास केला जाईल, असे वीजमंत्री सुदिन ढवळीकर म्हणाले.