Goa Navratri 2023: बाणावली येथील श्री लक्ष्‍मी देवालयात नवरात्रोत्सवानिमित्त विविध कार्यक्रम सुरू असून, त्‍यास उत्‍स्‍फूर्त प्रतिसाद मिळत आहे. उद्या रविवार दि. 22 ऑक्‍टोबर रोजी सकाळी 8 वाजल्यापासून विविध धार्मिक कार्यक्रम, 11 वाजता सुवासिनींकडून महालक्ष्मी षोडशोपचार पूजा, श्री ललिताष्टोत्तर शतनामावली कुंकुमार्चन होईल. यजमानपद संजय लक्ष्मण वेर्णेकर (कोलवा) यांना लाभले आहे.

संध्याकाळी ६.३० वाजता युवा स्वरनाद, पर्वरी प्रस्तुत ‘पावन नवरात्री’ हा भावगीत, भक्तिगीत व मनोरंजनाचा कार्यक्रम होणार आहे. रात्री ८ वाजता मखरोत्सव, ८.३० वाजता श्री लक्ष्मी देवालय युवा घुमट आरती मंडळातर्फे (बाणावली) घुमट आरती व नंतर महाप्रसाद होणार आहे.

सोमवार दि. २३ रोजी सकाळी होणाऱ्या विविध धार्मिक विधींचे यजमानपद अॅड. रमाकांत बाबली वेर्णेकर (कोलवा) यांना लाभले आहे. दुपारी १२ ते १ पर्यंत कुमारीपूजन. संध्याकाळी ६ वाजता नंदकिशोर देसाई (पेडणे) यांचे कीर्तन, रात्री ८ वाजता मखरोत्सव, ८.३० वाजता रामनाथ दामोदर आरती मंडळातर्फे (शिरोडा) घुमट आरती व नंतर महाप्रसाद होईल.

मंगळवार दि. २४ रोजी देवस्‍थान समितीतर्फे विजयादशमी (दसरा) उत्‍सव साजरा करण्‍यात येणार आहे. सकाळी श्रींस अभिषेक. दुपारी १२ वाजता श्री देवी महालक्ष्मीची पालखीत्‍सव, सिमोल्लंघन, शमीपूजन व सोने लुटणे, दुपारी १ वाजता श्री लक्ष्मी देवालय युवा घुमट आरती मंडळातर्फे (बाणावली) घुमट आरती व नंतर महाप्रसाद होणार आहे. भाविकांनी मोठ्या संख्‍येने उपस्‍थिती लावावी, असे आवाहन देवस्‍थान समितीतर्फे करण्‍यात आले आहे.