देशात आगामी पाच राज्यांच्या विधानसभा निवडणुकांची लगबग सुरु झाली आहे. यातच गोव्यातही (Goa) मोठी राजकीय समीकरणे पाहायला मिळू लागली आहेत. मागील काही दिवसांपूर्वीच कॉंग्रेस (Congress) आणि गोवा फॉरवर्ड पक्षाने (Goa Forward Party) युती करत सत्तेमध्ये असणाऱ्या भाजपला (BJP) दणका दिला आहे. याच पाश्वभूमीवर कॉंग्रेसच्या वरिष्ठ नेत्या प्रियंका गांधी (Priyanka Gandhi) गोवा विधानसभा निवडणुकीच्या प्रचारानिमित्त शुक्रवारी गोव्यात दाखल झाल्या. त्या प्रथमच गोव्यात येत असल्याने त्यांनी दुपारी मोरपिर्ला येथील आदीवासी महिलांसोबत संवाद साधला. विशेष म्हणजे त्यांच्या जेवणाचा कार्यक्रमही आयोजित करण्यात आला होता, अशी माहितीही पी. चिंदबरम यांनी दिली.

दरम्यान, कॉंग्रेस नेते आणि वायनाडचे खासदार राहुल गांधी (Rahul Gandhi) यांनी ऑक्टोबर महिन्यामध्ये गोव्यात येऊन गेले होते. आता प्रियंका गांधी गोव्यात आल्या आहेत. त्या दिवसभर दक्षिण गोव्यातील विविध कार्यक्रमांना हजेरी लावणार आहेत. त्यांच्या नियोजित कार्यक्रमांची रुपरेषा गुरुवारी जाहीर करण्यात आली होती.