सासष्टी: पावसाळा तोंडावर आला असल्याने मडगाव पालिकेतर्फे सोमवारी (ता. 16) मॉन्सूनपूर्व कामांना सुरवात करण्यात येणार आहे, अशी माहिती नगराध्यक्ष लिंडन परेरा यांनी दिली. मडगाव पालिकेचे मुख्याधिकारी म्हणून तात्पुरता ताबा स्वीकारलेले अतिरिक्त जिल्हाधिकारी सुरेंद्र नाईक यांनी सांगितले की, पावसाळापूर्व कामासंबंधी फाईल आपण क्लिअर केली आहे. त्यामुळे पुढील आठवड्यापासून ही कामे सुरू होतील.

हल्लीच झालेल्या पालिकेच्या बैठकीत पावसाळापूर्व कामावरून खडाजंगी झाली होती. अगोदर ही कामे चार कंत्राटदारांना देण्याचे ठरले होते. पण, केवळ दोन कंत्राटदारांना निविदा भरल्याने हे काम योग्य वेळेत पूर्ण होतील की नाही या बद्दल साशंकता निर्माण झाली आहे. नगरपालिका प्रशासन खात्यानेही या संदर्भातील फाईली क्लिअर केल्या आहेत. जर पावसाळ्यापूर्वी ही कामे पूर्ण झाली नाहीत तर संपूर्ण मडगाव शहर पाण्याखाली येण्याची शक्यता आहे. शिवाय रस्त्याच्या दोन्ही बाजूंनी असलेल्या खळ्यांमध्ये पानापाचोळा साठलेला आहे, तो तेथून काढणे आवश्यक आहे.