डिचोली: पूरप्रतिबंधात्मक उपाययोजना म्हणून सध्या डिचोलीतील नदी स्वच्छ करण्यात येत आहे. मान्सूनपूर्व कामांतर्गत सध्या डिचोली शहरातील मुख्य नदीतील गाळ उपसण्याचे काम हाती घेण्यात आले आहे. खास मशिनरीद्वारे सध्या नदीत वाढलेली जलपर्णी काढण्यात येत आहे. आमदार डॉ. चंद्रकांत शेट्ये यांच्या आदेशानुसार जलसंसाधन खात्यातर्फे हे काम करण्यात येत आहे.

शहरातील नदीत विविध ठिकाणी जलपर्णीचे आक्रमण वाढले आहे. दरवर्षी या नदीत मोठ्या प्रमाणात गाळ साचताना जलपर्णी उगवत असते. याखेरीज ही नदी प्लास्टिक आदी कचऱ्याने साचत असते.

पावसाळ्यात नदी तुंबली, की नदीबाहेर पाणी फुटून मोठी समस्या निर्माण होत असते. यापूर्वीही नदी तुंबून पूरसदृश्य स्थिती निर्माण झाली होती. ही समस्या उद्भवू नये. त्यासाठी खास दोन तरंगती मशीन आणून जलपर्णी काढण्यात येत आहे.

जलपर्णी काढल्यानंतर जेसीबी यंत्राद्वारे नदीतील गाळ काढण्यात येणार आहे अशी माहिती मिळाली आहे. पावसाळ्यापूर्वी हे काम पूर्ण करण्याच्यादृष्टीने खात्याचे प्रयत्न चालू आहेत, अशी माहिती जलस्रोत खात्याच्या सूत्रांकडून मिळाली आहे. गेल्यावर्षीही मशिनरीद्वारे नाल्यातील जलपर्णी काढण्यात आली होती.