मडगाव: गोव्यातील असंख्य गुंतवणूकदारांचे पैसे क्रीप्टो करन्सीत गुंतवण्याचे आमिष दाखवून तब्बल साडे नऊ कोटींचा गंडा घालणाऱ्या रंगीता एंटरप्राइजेस घोटाळ्यातील मुख्य संशयित जयकुमार गोहिल याची पत्नी आरती कश्यप हिला आज दक्षिण गोव्याचे प्रधान सत्र न्यायाधीश इर्शाद आगा यांनी अटकपूर्व जामीन मंजूर केला.

(Pre-arrest bail granted to the wife of the main suspect in the 9.5 crore scam)

संशयित कश्यप हिला 15 महिन्याचे बाळ असून तिला अटक केल्यास बाळाकडे पाहण्यास कुणी नसेल असे तिचे वकील ऍड. शैलेश ठाणेकर यांनी पटवून दिल्यावर न्या. आगा यांनी हा अर्ज मंजूर केला. संशयिताला अटक केल्यास 25 हजारांच्या जामिनावर मुक्त करावे असे त्यांनी आपल्या आदेशात म्हटले आहे.

गुंतवणूकदारांना 30 टक्के व्याजाचा परतावा देण्याचे आमिष दाखविल्याने या कंपनीत लोकांनी लाखो रुपयांची गुंतवणूक केली होती. सुरवातीला काही दिवस असा परतावा दिल्यावर नंतर मुख्य संशयित जयकुमार गोहिल याने आपले मडगाव येथील दुकान बंद करून गुजरातला पळ काढला होता. नंतर आर्थिक गुन्हेगारी विरोधी विभागातील पोलिसांनी त्याला गुजरात येथे जाऊन अटक केली होती. जयकुमार गोहिल यानेही जामिनासाठी अर्ज केला असून तो 3 ऑगस्ट रोजी सुनावणीस येणार आहे. या प्रकरणी अटक केलेल्या स्वीजल फेर्नांडिस आणि लिंबाजी लमाणी यानी जामिनासाठी केलेल्या अर्जावर उद्या 28 रोजी न्या. आगा यांच्या समोर सुनावणीस येणार आहे.