काणकोण: काणकोणात (Canacona) भाजपची उमेदवारी दोलायम अवस्थेत आहे. कोणालाही उमेदवारी दिल्यास काणकोणमधील भाजपच्या पारंपरिक मतदारांची तीन गटांत विभागणी होणार आहे. एक गट विद्यमान आमदार व उपसभापती इजिदोर फर्नांडिस, दुसरा गट माजी मंत्री रमेश तवडकर व तिसरा गट भाजपचे माजी आमदार विजय पै खोत यांची तळी उचलून धरणार असल्याचे स्पष्ट दिसत आहे.

भाजपमधील (BJP) काही प्रमुख कार्यकर्त्यांना फर्नांडिस यांच्या कामाचा धडका बघून उमेदवारी फर्नांडिस यांनाच मिळायला हवी, असे स्पष्ट मत ते व्यक्त करीत आहेत. विजय पै खोत गत निवडणुकीतील (Goa Election) पराभवाचे खापर तवडकर यांच्यावर फोडून गेले सहा महिने अपक्ष उमेदवारीवर ठाम असून, त्यांनी प्रचारही सुरू केला आहे. आपल्या निवासस्थानी निवडक कार्यकर्त्यांची बैठक घेऊन मतदारसंघात या कार्यकर्त्यांमार्फत कामही त्यांनी सुरू केले आहे.

‘लोकोत्सव-2021’च्या यशस्वी आयोजनानंतर माजी मंत्री रमेश तवडकर यांनी मतदारसंघात प्रत्येक बूथवर कोपरा बैठका घेण्यास आरंभ केला आहे. सध्या तवडकर व फर्नांडिस आपल्यालाच भाजपची उमेदवारी मिळेल, असा दावा करत आहेत.

पुनरावृत्तीची शक्यता!

फर्नांडिस यांनी काणकोण मतदारसंघात विकास कामांचा धडका लावला आहे. भाजपची उमेदवारी न मिळाल्यास अपक्ष उमेदवारीवर ते निवडणूक लढविण्याची शक्यता त्याच्या निकटवर्तीयांनी व्यक्त केली आहे. त्यामुळे काणकोणात (Canacona) गेल्या विधानसभा निवडणुकीची (Assembly Election) पुनरावृत्ती होण्याची शक्यता आहे.