पणजी: पर्वरीतील उड्डाण पुलाच्या रेषेत अडथळा येत असलेल्या जुन्या झाडांचे स्थानांतरीत करताना ‘डॉक्टर ट्री’ एजन्सीने अवलंबिलेली प्रक्रिया अयोग्य दर्जाची आहे. झाडांच्या जगण्याची फारशी काळजी घेतली गेलेली नाही. या झाडांचे अस्तित्व सुनिश्‍चित करण्यासाठी तसेच ती जगण्यासाठी स्थानांतरित स्थळे योग्य पद्धतीने निवडण्याची गरज आहे, असा निष्कर्ष व शिफारस याचिकादाराने नियुक्त केलेल्या लँडस्केप डिझाईनर तज्ज्ञ पराग मोदी यांनी अहवालात केली आहे.

पर्वरीतील (Porvorim) श्रद्धास्थान असलेल्या वटवृक्षासंदर्भात योग्य प्रक्रिया व काळजी घेण्यासंदर्भात वन खात्याच्या कार्यालयात येत्या शुक्रवारी (३१ जानेवारी) वन खात्यासह याचिकादार, सार्वजनिक बांधकाम, ‘डॉक्टर ट्री’ एजन्सीचे अधिकारी तसेच लँडस्केप तज्ज्ञ मोदी यांची संयुक्त बैठकीत चर्चा होणार असून त्याच्या नियोजनाचा अहवाल पुढील मंगळवारी (४ फेब्रुवारी) मुंबई उच्च न्यायालयाच्या गोवा खंडपीठात सादर केला जाणार आहे. पर्वरी येथील जुनी झाडे स्थानांतरप्रकरणी ॲडव्होकेट जनरल देविदास पांगम यांनी संयुक्त बैठक घेऊन त्यावर चर्चा करून योग्य निर्णय घेण्याबाबत पर्याय सुचविला तो खंडपीठाने मान्य केला. या झाडांच्या स्थानांतरितासाठी येणाऱ्या खर्चावर समझोता केला जाणार नाही असे त्यांनी खंडपीठाला स्पष्ट केले.

सहापैकी पाच जुनी झाडे ‘डॉक्टर ट्री’ एजन्सी कंत्राटदाराने स्थानांतरित केली आहेत. ही झाडे स्थानांतरीत करत त्यांच्या मोठ्या फांद्या तसेच खोलवरील मुळे कापण्यात आली आहेत. त्यामुळे या झाडे जिवंत राहण्याची शक्यता कमी आहे, असे लँडस्केप डिझाईनर मोदी यांनी या झाडांची तपासणी करून दिलेल्या अहवालात नमूद केले आहे. ही झाडे जलाशयाजवळील भातशेतीच्या क्षेत्रात स्थानांतरित करण्यात आली आहेत. झाडांची छाटणी केल्याने प्रजाती ओळखणे अवघड झाले आहे व त्यांच्या पुनर्प्राप्तीच्या क्षमेतवर गंभीर परिणाम झाला आहे. झाडाची मुळे अधिक प्रमाणात कापण्यात आली आहेत, ज्यामुळे झाडांची पोषक तत्वे व पाणी शोषणाची क्षमता धोक्यात आली आहे. वृक्ष वटवृक्ष म्हणून ओळखणे अशक्य झाले आहे.

खर्च टाळण्यासाठी हलक्या यंत्रांचा वापर

स्थानांतरितावेळी हाताळणी निकृष्ट दर्जाची होती, कारण खर्च कमी करण्यासाठी जेसीबी व लहान क्रेन यासारखी हलकी यंत्रे वापरली गेली, अशी टिप्पणी तज्ज्ञ मोदी यांनी केल्याची माहिती याचिकादारतर्फे ॲड. नॉर्मा आल्वारिस यांनी खंडपीठाला दिली.