बोरी: सुमारे २०० वर्षांपूर्वी पोर्तुगीज अमदानीत बोरी येथे झुआरी नदीवर बांधलेल्या पुलाचे भग्न अवशेष आजही आपले अस्तित्व टिकवून आहेत. पोर्तुगीज अमदानीतील हा पहिला पूल आजही आपल्या जुन्या आठवणींना उजाळा देत आहे.

पोर्तुगीजांनी जातेवेळी बॉम्ब घालून या पुलाचा काही भाग उडवून दिला होता. त्यानंतर भारतीय लष्कराने या पुलाचा निकामी बनलेल्या भाग हटवून त्या ठिकाणी तंरगता पूल बांधला. या पुलावरून बरीच वर्षे वाहतूक चालू राहिली होती.

दरम्यान, झुआरी नदीच्या पात्रातून जाणाऱ्या बार्जींनी पुलाच्या खांबावर धडक देऊन हा पूल खिळखिळी केला. पुढे हा पूल वाहतुकीस निकामी झाल्याने तो हटवून जवळ नवा पूल बांधला.मात्र जुन्या पुलाच्या दोन्ही बाजूंच्या जोड रस्त्याच्या दगडी कमानी अजूनही मजबूत उभ्या आहेत. सध्या त्यावर झुडपे वाढलेली आहेत.

पोर्तुगीज अमदानीत बांधलेला हा ऐतिहासिक पूल त्या काळातील स्थापत्यकलेचे प्रतीक मानला जातो. पोर्तुगीजांनी आपल्या प्रशासनकाळात या भागात महत्त्वपूर्ण पूल उभारले होते. त्यातीलच हा झुआरीवरील पूल एक आहे.

योग्य देखभाल केल्यास या ऐतिहासिक वास्तूचे जतन करता येऊ शकते. स्थानिक नागरिक आणि इतिहासप्रेमींनी या जागेचे जतन करण्याची मागणी केली आहे. हा पूल केवळ वाहतुकीसाठीच नव्हता, तर तो त्या काळातील राजकारण, व्यापार आणि सांस्कृतिक संबंधांचा साक्षीदार होता, याची आठवण आजही त्याचे भग्न अवशेष करून देतात.