Pooja Naik Job Scam: गोव्यात सध्या गाजत असलेल्या पूजा नाईक प्रकरणात अनेक राजकीय नेत्यांची नावे चर्चेत असताना राज्याचे मंत्री सुदिन ढवळीकर यांनी मोठे आणि स्पष्ट विधान केले आहे. पूजा नाईक हिच्या दाव्यांवर आपला विश्वास नसल्याचे सांगत, ती ही नावे स्वतःला वाचवण्यासाठी किंवा एखाद्याला लक्ष्य करण्यासाठी घेत असण्याची शक्यता त्यांनी व्यक्त केली.

मुख्यमंत्री निर्णय घेतील: ढवळीकर

या प्रकरणावर बोलताना मंत्री ढवळीकर म्हणाले की, मुख्यमंत्री डॉ. प्रमोद सावंत (Chief Minister Dr. Pramod Sawant) यांनी या घोटाळ्याची चौकशी आधीच सुरु केली आहे. तपास पूर्ण झाल्यावर तेच या प्रकरणावर अंतिम निर्णय घेतील.

पूजा नाईकच्या दाव्यांवर संशय

पूजा नाईककडून चौकशीत काही नावे समोर येत असल्याच्या चर्चेवर ढवळीकर यांनी थेट संशय व्यक्त केला. ते म्हणाले, "पूजा नाईक जी काही नावे घेत आहे, त्यावर माझा विश्वास नाही. ती फक्त स्वतःला वाचवण्यासाठी इतरांची नावे घेत असावी किंवा एखाद्या राजकीय व्यक्तीला लक्ष्य करत असावी, असे मला वाटते." या विधानामुळे, पूजा नाईक प्रकरणाला आता केवळ आर्थिक घोटाळ्याची नाही, तर राजकीय संघर्षाचीही किनार मिळाल्याचे दिसत आहे.

दोषी आढळल्यास कठोर शिक्षा व्हावी

या घोटाळ्याची चौकशी योग्य पद्धतीने व्हावी, अशी अपेक्षा ढवळीकर यांनी व्यक्त केली. त्यांनी स्पष्ट केले की, तपासानंतर या प्रकरणात जो कोणी दोषी आढळेल, मग तो कितीही मोठा असो, त्याला कोर्टाने कठोर शिक्षा करावी. या नोकरी घोटाळ्यामुळे गोव्यातील (Goa) राजकारण चांगलेच तापले असून, तपास यंत्रणांच्या अहवालाकडे सर्वांचे लक्ष लागले आहे.