फोंडा: दारूच्या नशेत माणूस किती खालची पातळी गाठू शकतो, याचा धक्कादायक प्रत्यय बोरी येथे आला आहे. स्वतःच्याच अल्पवयीन मुलीचा विनयभंग करण्याचा प्रयत्न केल्याप्रकरणी फोंडा पोलिसांनी एका नराधम पित्याला अटक केली आहे. मूळचा उत्तर प्रदेशातील असलेला हा इसम सध्या आवेडे-बोरी येथे वास्तव्यास होता. या घटनेमुळे परिसरात एकच खळबळ उडाली आहे.

नशेच्या आहारी जाऊन घडले कृत्य

ही धक्कादायक घटना मंगळवारी, २३ तारखेला रात्री ९ वाजण्याच्या सुमारास घडली. घटनेवेळी संशयिताची पत्नी आपल्या गावी उत्तर प्रदेशात गेली होती. याच संधीचा फायदा घेत पित्याने दारूच्या नशेत आपल्या १४ वर्षीय मुलीचा विनयभंग करण्याचा प्रयत्न केला. मात्र, त्या मुलीने धाडसाने प्रतिकार केला आणि तेथून पळ काढला.

मुलीने शाळेतील शिक्षिकेला सांगितला प्रकार

या घटनेनंतर घाबरलेल्या मुलीने दुसऱ्या दिवशी शाळेत जाऊन एका समुपदेशकाला (कौन्सिलर) हा सर्व प्रकार सांगितला. त्यानंतर मुख्याध्यापिकेने या प्रकरणाचे गांभीर्य लक्षात घेत तात्काळ फोंडा पोलीस ठाण्यात तक्रार दाखल केली.

पोलिसांनी घटनेची नोंद घेऊन तात्काळ तपास सुरू केला. या प्रकरणी पोलिसांनी विनयभंगाचा गुन्हा दाखल करून आरोपी पित्याला अटक केली आहे. फोंडा पोलीस पुढील तपास करत आहेत.