पणजी: १८ वर्षांच्या प्रतीक्षेनंतर पोलिस हवालदार कांचन चोडणकर पुन्हा सेवेत रुजू होणार आहेत. मुंबई उच्च न्यायालयाच्या गोवा खंडपीठाने त्यांच्या २००७ मधील निलंबन व सेवेतून बडतर्फीचे आदेश रद्द करत, गोवा सरकार व गोवा पोलिसांना एका आठवड्यात त्यांना पुन्हा सेवेत रुजू करण्याचे आदेश दिले आहेत.

चोडणकर यांना २००७ साली प्रथम निलंबित करण्यात आले होते. त्यानंतर हुंडाबळी, स्फोटकांचा बेकायदेशीर वापर, धमक्या व मारहाण या स्वरूपाच्या तीन वेगवेगळ्या प्रकरणांतील आरोपांच्या पार्श्वभूमीवर कोणतीही विभागीय चौकशी न करता त्यांची सेवा समाप्त करण्यात आली होती.

न्यायालयाने स्पष्ट केले की, साक्षीदार विभागीय चौकशीत सहकार्य करणार नाहीत या कारणावर आधारित बडतर्फी हा कायदेशीरदृष्ट्या ग्राह्य आधार नाही. त्यामुळे न्यायाच्या मूलभूत तत्त्वांचे उल्लंघन झाले असल्याचे ठरवत, न्यायालयाने बडतर्फी आदेश रद्द केला.

खंडपीठाने पोलिस विभागाला नवीन विभागीय चौकशी सुरू करण्याची मुभा दिली असून त्याचवेळी चोडणकर यांना तत्काळ सेवेत पुन्हा घेण्याचे निर्देश दिले आहेत.