Goa Police : राज्यात गुन्हेंगारीची दिवसेंदिवस वाढ होत असल्याच्या पार्श्वभूमीवर बार्देशातील विविध भागात वास्तव्य करून असलेल्या परप्रांतीय कामगारांची पोलिसांकडून कसून तपासणी सुरु आहे. याच मोहीमेचा भाग म्हणून गुरुवारी केलेल्या धडक कारवाईत इग्रजवाडा, मार्ना-शिवोली येथून 26 कामगारांना ताब्यात घेण्यात आले. संध्याकाळी उशिरा केलेल्या या कारवाईत हणजूण पोलिस स्थानकाचे निरीक्षक प्रशाल देसाई आणि एकूण 15 पोलिस कर्मचाऱ्यांनी भाग घेतला.

दरम्यान, यापुढेही अशाप्रकारची कारवाई सुरुच राहणार आहे. तसंच जे घरमालक जाणूनबुजून भाडेकरुंची माहिती लपवून ठेवतात त्यांच्यावरही कायदेशीर कारवाई करण्यात येणार असल्याची माहिती निरीक्षक देसाई यांनी दिली.

कामगार वर्ग घरी परतण्याच्या वेळेत हणजूण पोलीस पथक शिवोली येथील सेंट अँथनी चर्च परिसरात दाखल झाले आणि तेथून त्यांनी मोठ्या प्रमाणात भाडेकरु कामगार वास्तव्य करुन राहाणाऱ्या एका भाडोत्री चाळीकडे त्यांनी आपला मोर्चा वळविला. यावेळी उपस्थित 200 हून आधिक कामगारांची झाडाझडती तसेच त्यांच्या कागदपत्रांची पोलिसांनी तपासणी केली. यावेळी 26 कामगार योग्य कागदपत्रांविना याभागात वास्तव्य करून राहात असल्याचं आढळून आलं.

पोलिसांनी कागदपत्रांविना वास्तव्य करणाऱ्यांविरोधात तात्काळ कारवाई करत सर्वांना ताब्यात घेतलं. या सर्व कामगारांना हणजुणच्या पोलिस स्थानकात दाखल करण्यात आलं असून त्यांची चौकशी सुरु आहे. घरमालकांना  भाडेकरुंची माहिती पोलिसांना देण्याचे वारंवार सूचित करुनही अनेकजण याबाबत कानाडोळा करत असल्याने कडक कारवाईचे संकेत निरीक्षक प्रशाल देसाई यांनी दिले आहेत. या कारवाईत निरीक्षक प्रशाल देसाई यांच्या नेतृत्वाखालील पथक सहभागी झालं होतं.