South Goa Zilla Panchayat : सभापती तथा काणकोणचे आमदार रमेश तवडकर हे आपल्‍यावर विविध कामांसाठी दबाव आणतात. गरिबांची कामे करण्याऐवजी आपल्‍या संस्थेच्या शाळेचे काम करायला सांगतात.

खोतीगावात झालेल्‍या महिला शक्ती कार्यक्रमावेळी त्‍यांनी मला अपात्र ठरवण्याची धमकीही दिली, असे सांगून पैंगीण जिल्हा पंचायत सदस्य शोभना वेळीप जिल्हा पंचायतीच्या बैठकीतच ढसाढसा रडल्या. आपल्याला प्रत्येक वेळी त्‍यांनी अपमानित केले, असा आरोपही केला.

कणकोणच्‍या आमदारांकडून लोकप्रतिनिधीचा कोणत्याही प्रकारचा सन्मान केला जात नाही, उलट त्‍यांना अपमानित केले जाते.

लोकांच्या कामांसाठी आवश्यक परवानगीची पत्रे देण्यास ते टाळाटाळ करतात, असा आरोप शोभना वेळीप यांनी केला.

याबाबत दक्षिण गोवा जिल्हा पंचायत अध्यक्ष सुवर्णा तेंडुलकर यांनी सांगितले की, अजूनही माझ्‍याकडे शोभना वेळीप यांनी तक्रार केलेली नाही.

काम करण्याबाबत त्यांनीच सहमती दर्शविली होती. त्यामुळे दबावाचा प्रश्नच येत नाही. जिल्हा पंचायत सदस्यांच्या कामात कुणीही ढवळाढवळ करत नाही. आमदार व जिल्हा पंचायत सदस्यांचे पटत नाही त्यावेळी अशा घटना घडतात.

"मी कोणाला धमकी दिली नाही वा कोणावर दबाव आणला नाही. भाजपच्‍या जिल्‍हा पंचायत सदस्‍य असूनही शोभना वेळीप या विरोधकांच्‍या व्‍यासपीठावर दिसायच्‍या. त्‍यामुळे ‘मनात आणले असते तर पक्षविरोधी कारवायांमुळे तुझे सदस्यत्‍व रद्द झाले असते’ असे मी म्‍हटले होते. त्‍यांना चिथावणारे वेगळेच आहेत."

- रमेश तवडकर, सभापती