PM Modi Visit To Goa: मडगाव येथे पंतप्रधान नरेंद्र मोदी यांच्या प्रचार सभेला लोकांच्या अल्प प्रतिसादामुळे मुख्यमंत्री डॉ. प्रमोद सावंत यांच्या नेतृत्वाखालील गोव्यातील भ्रष्ट भाजप सरकार हैराण झाले आहे.

सभागृह भरगच्च दिसण्यासाठी सरकारने गर्दी जमवण्याच्या हेतूने राज्यासह लगतच्या महाराष्ट्रातून - सिंधुदुर्गातून लोकांना सभास्थळी आणले जात असल्याचा घणाघात काँग्रेसचे प्रदेशाध्यक्ष अमित पाटकर यांनी केला आहे.

20 हजार क्षमतेचे पंडित नेहरू स्टेडियम फक्त 500 मीटर अंतरावर असतानाही पंतप्रधान बस स्टँडवर सभेला संबोधित करण्याची ही पहिलीच वेळ असल्याची बोचरी टीकाही त्यांनी यावेळी केली.

उच्च शिक्षण विभागाने जारी केलेल्या परिपत्रकाने सरकारी खर्चावर पंतप्रधान मोदींच्या प्रचार सभेसाठी गर्दी जमवण्याबाबत भाजप सरकार करत असलेली धडपड उघड झाली आहे.

विद्यार्थ्यांना राजकीय सभेला उपस्थित राहण्यासाठी तयार केलेल्या परिपत्रकाचा निषेध करतो. भाजपने बेशरमीची हद्द ओलांडली असल्याचे पाटकर म्हणाले.

भारत विकास रॅलीच्या प्रचार साहित्यात दक्षिण गोव्याचे खासदार फ्रांसिस सार्दिन यांचा समावेश नाही. हा दक्षिण गोव्यातील जनतेचा अपमान आहे.

2019 मध्ये भाजपला मत न दिल्याने दक्षिण गोव्यातील जनतेला अपमानीत करण्याची संधी भाजपने घेतली असल्याचा दावा अमित पाटकर यांनी केला.

तसेच मोदींनी गोव्यात आणखी दहा सभा घेतल्या तरी आगामी निवडणुकीत काँग्रेस लोकसभेच्या दोन्ही जागा जिंकेल, असा विश्वास अमित पाटकर यांनी व्यक्त केला आहे.