PM Modi Goa Visit: प्रधानमंत्री नरेंद्र मोदी यांच्या सभेच्या वेळी सुरक्षेचा उपाय म्हणून सभास्थळी असलेली सर्व दुकाने आणि मार्केट उद्या 6 फेब्रुवारी रोजी बंद ठेवण्याचाआदेश दक्षिण गोवा जिल्हाधिकाऱ्यांनी जारी केला आहे.

जिल्हाधिकारी आश्विन चंद्रू यांनी आज एक आदेश जारी करून मडगाव कदंब बस स्थानक परिसरातील मासळी मार्केट, भाजी मार्केट , गाडे आणि इतर आस्थापने बंद ठेवण्याचा आदेश जारी केला.

दरम्यान मडगाव शहरातील उच्च माध्यमिक विद्यालये आणि महाविद्यालये दुपारी 12 वाजेपर्यंत उघडी ठेवावीत आणि नंतर दुपारी 1 वाजता विद्यार्थ्यांना प्रधानमंत्री नरेंद्र मोदी यांच्या सभेला पाठवावे असा आदेश उच्च शिक्षण संचालक भूषण सावईकर यांनी जारी केला आहे.

सभेला येणाऱ्या विद्यार्थ्याच्या जेवणाची सोय सभा ठिकाणीं केली जाईल असे या आदेशात म्हटले आहे.

उद्या म्हणजेच मंगळवारी 6 फेब्रुवारीला मडगाव येथे होणाऱ्या पंतप्रधान नरेन्द्र मोदींच्या सभेसाठी भाजपने जय्य्त तयारी केली असून सुरक्षेवर विशेष भर दिला आहे. मोदी राज्यातील विविध विकासकामांचे उद्घाटन करतील.

त्यानंतर मडगावमध्ये त्यांची भव्य सभा होणार आहे. या सभेला सुमारे 50 हजार लोक उपस्थित राहण्याची शक्यता मुख्यमंत्री सावंत यांनी व्यक्त केली आहे.

मोदी ज्या मार्गावरुन प्रवास करणार आहेत त्या राष्ट्रीय महामार्ग 17 च्या हद्दीत येणाऱ्या गावांना गट विकास अधिकाऱ्यांच्यावतीने पंचायतींना मेमो सादर करण्यात आला आहे.

महामार्गावर भटके कुत्रे, गायी येणार नाहीत याची काळजी घ्यावी. तसेच, महामार्गालगत कचरा टाकू नये अशीही सूचना करण्यात आली आहे.