Mining Issue In Goa

डिचोली: 'खाण व्यवसायामुळे उद्ध्वस्त झालेली शेती सुपीक करून पूर्ववत आम्हाला द्या' या मागणीसाठी गेले वर्षभर संघर्ष करणारे पिळगावमधील शेतकरी पुन्हा एकदा संघटित झाले आहेत.

आक्रमक बनलेल्या या शेतकऱ्यांनी आजपासून (बुधवारी) 'रस्ता बंद' आंदोलन सुरू केले आहे. लाकडी कुंपण घालून सारमानस भागात वेदान्ताच्या खाणीवरील रस्ता अडवला. इतकेच नव्हे तर या शेतकऱ्यांनी रस्त्यावर चक्क झोपडीही उभारली.

'आमची शेतजमीन सुपीक करून आमच्या ताब्यात मिळेपर्यंत आम्ही मागे हटणार नाही. रस्ता बंद आंदोलन चालूच राहणार, असा इशारा या शेतकऱ्यांनी दिला आहे. गेल्या फेब्रुवारी महिन्यातही शेतकऱ्यांनी अशाच प्रकारे रस्ता अडवला होता. त्यावेळी या मागणीसंदर्भात तोडगा काढण्याची ग्वाही प्रशासकीय पातळीवरून देण्यात आली होती. त्यामुळे त्यावेळचे आंदोलन शेतकऱ्यांनी मागे घेतले होते.

फेब्रुवारी महिन्यातील आंदोलनानंतर कंपनीच्या अधिकाऱ्यांसमवेत आत्तापर्यंत प्रशासकीय पातळीवर अनेक बैठका झाल्या. मात्र सकारात्मक तोडगा निघत नसल्याने संतप्त शेतकऱ्यांनी पुन्हा आंदोलन करण्याचा निर्णय घेताना आज खाणीवरील रस्त्यावर अडथळे निर्माण केले. आजच्या आंदोलनासंदर्भात शेतकऱ्यांनी प्रशासकीय यंत्रणेला आगाऊ लेखी कल्पना दिल्याचे समजते.

आंदोलनावेळी पिळगावच्या सरपंच मोहिनी जल्मी यांच्यासह उज्ज्वला बेतकीकर, चेतन खोडगीणकर, स्वप्निल फडते हे पंचसदस्य उपस्थित होते.

मामलेदारांकडून मध्यस्थीचे प्रयत्न

पिळगावमधील शेतकऱ्यांनी खाणीवरील रस्ता अडविल्याची माहिती मिळताच डिचोलीचे मामलेदार प्रवीण गावस आणि संयुक्त मामलेदार आंदोलनस्थळी दाखल झाले. त्यांनी आंदोलनकर्त्यांशी चर्चा करून त्यांची समजूत काढण्याचे प्रयत्न केले.

मात्र शेतकरी आपल्या भूमिकेशी ठाम राहिले. शेतकऱ्यांनी मामलेदारांसमोर आपली भूमिका स्पष्ट केली. रस्त्याचा सर्व्हे केल्यानंतरच पुढील कारवाई करण्यात येणार असल्याचे मामलेदारांनी स्पष्ट केले. यावेळी मोठा पोलिस फौजफाटा तैनात होता.