पणजी: देशात बंदी घातलेल्या पॉप्युलर फ्रंट ऑफ इंडियाचे चार सदस्य आणि गोवा युथ फाउंडेशनच्या एकाची गोव्यात चौकशी करण्यात आली. सध्या सुरु असलेल्या संत फ्रान्सिस झेवियर शव दर्शन सोहळ्याच्या पार्श्वभूमीवर सामाजिक सलोखा आणि शांतात बिघडवण्याच्या संभाव्या हालचालीवरुन ही चौकशी केल्याची माहिती समोर आली आहे.

गोवा पोलिसांनी एका प्रसिद्धीपत्रकाद्वारे याबाबत माहिती दिली आहे. दक्षिण गोव्यातून पॉप्युलर फ्रंट ऑफ इंडियाचे चार सदस्य यासिन नालुर, मोहम्मद हावेरी, इम्रान इलियास आणि शेख रौफ यांच्यासह गोवा युथ फाउंडेशनच्या अल्ताफ संडी यांची पोलिसांनी चौकशी केली.

ओल्ड गोव्यात आजपासून (२१ नोव्हेंबर) संत फ्रान्सिस झेवियर यांच्या अवशेषांच्या प्रदर्शनाला सुरुवात झाली आहे. या सोहळ्याच्या पार्श्वभूमीवर राज्यातील सामाजिक सलोखा आणि शांतात बिघडवण्याचा संभाव्य हालचाली सुरु असल्याची माहिती पोलिसांनी मिळाल्यानंतर ही चौकशी करण्यात आली आहे. दरम्यान, पॉप्युलर फ्रंट ऑफ इंडिया या संस्थेवर भारतात बंदी घालण्यात आली आहे.

यानंतर राज्यातील पोलिस अलर्ट मोडवर आले आहेत. राज्यात एकाचवेळी दोन आंतरराष्ट्रीय स्तरावरील महोत्सव होत असल्याने दोन्ही सोहळे शांततेत पार पाडण्यासाठी पोलिस प्रयत्नशील आहेत. दरम्यान, राज्यात इफ्फी आणि एक्सपोझिशन'साठी १३०० पोलिस, आयआरबी तुकडी, एटीएस पथक तैनात करण्यात आले आहे. शिवाय एक्सपोझिशनवर २४ तास सीसीटीव्हीच्या मदतीने नजर ठेवली जाणार आहे.