Amit Patkar: आमदार अपात्रता याचिकेवर सुनावणीप्रकरणी गोवा विधानसभेचे सभापती रमेश तवडकर यांच्या विरोधात काँग्रेसचे प्रदेशाध्यक्ष अमित पाटकर यांनी कोर्टात धाव घेतली आहे. आमदारांच्या अपात्रतेबाबत 9 डिसेंबर 2022 पूर्वी दाखल केलेल्या याचिकेवर सभापतींनी काहीही कार्यवाही केलेली नाही.

सर्वोच्च न्यायालयाच्या निकालानुसार अशा पद्धतीच्या प्रकरणांमध्ये याचिका दाखल केल्यानंतर तीन महिन्यात कार्यवाही करणे अपेक्षित आहे. पण डिसेंबरमध्ये याचिका दाखल करूनही त्यावर अद्याप कार्यवाही झालेली नाही.

त्यामुळे आता सभापतींविरोधात पाटकर यांनी हायकोर्टात धाव घेतली आहे. सभापतींना कार्यवाहीबाबत आदेश द्यावेत, अशी मागणी त्यांनी याचिकेतून केल्याचे समजते.

विधानसभा निवडणुकीनंतर काही काळातच काँग्रेसचे 8 आमदार फुटून सत्ताधारी भाजपमध्ये सामिल झाले होते. तेव्हापासून या प्रकरणावरून दोन्ही बाजूंनी वाद, युक्तीवाद सुरू आहे. काँग्रेस नेते गिरीश चोडणकर यांनीही याबाबत याचिका दाखल केली होती.