Miramar Beach Viral Video: गोव्यात समुद्रकिनाऱ्यावर वाहन घेऊन जाऊ नये असे वारंवार सांगितले असताना देखील काही पर्यटक आणि काही स्थानिक देखील या नियमाकडे दुर्लेक्ष करताना दिसतात.

यापूर्वी अनेकांना याप्रकरणी अशा घटनांमध्ये कारवाईला समोरे जावे लागले आहे. मात्र, काही जणांनी हम नही सुधरेंगे! असाच पवित्रा घेतल्याचे दिसते.

मिरामार बीचवर कार घेऊन गेलेल्या एकाला पणजी पोलिसांनी बुधवारी गुन्हा दाखल करून ताब्यात घेतले.

मिरामार समुद्रकिनाऱ्यावर कार चालवत घेऊन गेले आणि रेतीमध्ये कार अडकल्याचा एक व्हिडिओ बुधवारी (दि.24) समोर आला होता. समाज माध्यामांवर हा व्हिडिओ व्हायरल झाल्यानंतर पोलिसांनी या घटनेची दखल घेतली.

दरम्यान, पोलिसांनी याप्रकरणी गुन्हा दाखल करत कार मालकाला ताब्यात घेतले. पासिंगवरून ही कार गोव्यातीलच असल्याचे दिसत आहे.

उत्तर गोवा पोलिसांनी याप्रकरणाची दखल घेत भारतीय दंड संहिता कलम 279, 336 अंतर्गत गुन्हा दाखल केला आहे. पणजी पोलिसांनी कार चालकाला ताब्यात घेऊन कार क्रमांक (GA 09A 2212) जप्त केले आहे.

दरम्यान, अशा कृत्यांना गोव्यात प्रतिबंध घालण्यात आला आहे. समुद्रकिनारा फिरण्यासाठी निसर्गाचा आनंद घेण्यासाठी मात्र, काहीजण बीचवर वाहने घेऊन जातात आणि त्यांची वाहने अडकून पडतात. शिवाय यामुळे त्यांच्यासह इतरांना देखील नाहक त्रास सहन करावा लागतो.