Mopa Taxi Association Protest: मोपा-पेडणे येथील मनोहर आंतरराष्‍ट्रीय विमानतळावर अधिसूचित टॅक्सी स्टॅंड देण्यात यावा या मागणीसाठी दिलेली मुदत संपल्याने आज सोमवारी ग्रीन फिल्ड मोपा टॅक्सी असोसिएशन व मोपा लोकल टॅक्सी असोसिएशनने आपल्या टॅक्सी बंद ठेवून नागझर मैदानावर जोरदार आंदोलन केले.

मागणी मान्य झाली नाही तर उद्या मंगळवारपासून रस्त्यावर उतरण्‍याचा इशारा दिला.

सदर विमानतळासाठी शेतकऱ्यांच्या जमिनी कवडीमोलाने घेण्यात आल्या. अशा कुटुंबांच्या उदरनिर्वाहासाठी चार महिन्यांपासून आम्ही शांततेच्या मार्गाने आंदोलन करत आहोत, असे टॅक्सीचालकांचे नेते भास्कर नारुलकर यांनी सांगितले.

प्रस्‍ताव आंदोलकांनी नाकारला

संध्याकाळी मामलेदार अनंत मळीक, वाहतूक खात्याचे अतिरिक्त संचालक प्रल्हाद देसाई, पेडणे वाहतूक खात्‍याचे अधिकारी राजेश नाईक यांनी आंदोलकांचे नेते भास्कर नारुलकर व संघटनेचे अध्यक्ष उदय महाले यांच्याशी चर्चा केली.

या चर्चेत अधिसूचित टॅक्सी स्टॅंडसाठी अर्ज करण्याची सूचना केली. त्यावर, वृत्तपत्रात जाहिरात प्रसिद्ध झाल्यानंतर अर्ज करण्याचा नियम असल्याचे सांगून आंदोलक नेत्यांनी तो प्रस्ताव नाकारला. त्‍यामुळे आता मोठा पेच निर्माण झाला आहे.