Goa News: श्री सोमनाथ कला व सांस्कृतिक संघ, (मळीवाडा-नानेरवाडा-कोंडलवाडा) पेडणेतर्फे दुसरी पेडणे तालुका मर्यादित भव्य आकाशकंदील स्पर्धा रविवार, 6 रोजी रात्री 8 वाजता आयोजित करण्यात आलेली आहे.

ही स्पर्धा नानेरवाडा, पेडणे येथील श्री सोमनाथ देवालयाच्या भव्य पटांगणात आयोजित केली असून स्पर्धेत 4100रु.चे पहिले, 3100रु.चे दुसरे आणि 2100रु.चे तिसरे अशी अनुक्रमे तीन पारितोषिके ठेवण्यात आलेली असून पाचशे रुपयांची तीन उत्तेजनार्थ पारितोषिके पुरस्कृत केली आहेत.

आकाशकंदील स्पर्धेसाठी फक्त पहिल्या पंचवीस स्पर्धकांनाच प्रवेश दिला जाईल. गरज पडल्यास ऐनवेळी कार्यक्रमात फेरबदल करण्याचे अधिकार आयोजकांनी राखून ठेवलेले आहेत. इच्छुक स्पर्धकांनी पद्मनाभ आसोलकर किंवा दिप्तेश यांच्याशी संपर्क साधावा.

पेडणेत ‘कायदा सर्वांसाठी’ कार्यक्रम

उत्तर गोवा कायदा सेवा प्राधिकरण आणि पेडणे न्यायालयाची कायदा सेवा समिती यांच्या संयुक्त विद्यमाने ‘कायदा सर्वांसाठी’ या उपक्रमाखाली आठवडा बाजाराच्या दिवशी कायदा जागृती कार्यक्रम आयोजित करून कायद्याची माहिती लोकांपर्यंत पोहोचण्यासाठी काय करावे, यावर माहिती दिली.

व्यासपीठावर प्राधिकरण सचिव विजयलक्ष्मी शिवोलकर, पेडणे न्यायालयाच्या न्यायाधीश सुनिता गावणेकर, पेडणे वकील संघटनेचे अध्यक्ष मुरारी परब, वकील मंदार जोशी, प्रमुख वक्त्या वकील अक्षता पुराणिक भट उपस्थित होते.