Pernem Police: पेडणे काही दिवसांपूर्वी येथील स्मशानभूमीत पाणी-विजेची समस्या निर्माण झाल्याने वादाचा भडका उडाला होता.

आता रविवारी हिंदू स्मशानभूमीवरून गुढी-पारोडा परिसरातील नागरिकांनी थेट पोलिस स्थानकावर धडक दिली.

येथील गावकऱ्यांनी त्यांच्या स्मशानभूमीला कुंपण घालण्यासाठी सर्व्हे करून सिमेंटचे पोल पुरले होते; परंतु काही दिवसांनी एका व्यक्तीने ते सर्व पोल काढून टाकले.

त्यानंतर पुन्हा गावकऱ्यांनी श्रमदानातून पोल लावल्यावर परत ते पोल उखडून टाकण्याचा प्रकार घडला.

गावकऱ्यांनी जिमी रॉड्रिग्स याला हे पोल हटवताना पाहिले होते. त्यामुळे आज स्थानिक लोक संतप्त झाले आणि त्यांनी थेट केपे पोलिस स्थानकात धडक मोर्चा नेला.

उपासो गावकर म्हणाले की, आमचे पूर्वज या जागेचा स्मशानभूमी म्हणून वापर करीत होते. या स्मशानभूमीकडे जाणारी वाट सार्वजनिक नाही.

रॉड्रिग्स हा पोर्तुगीज पासपोर्टधारक असल्याने त्याला या जागेवर हक्क सांगण्याचा अधिकार नाही.

जाब विचारला असता धमकी

सरपंच राजश्री गावकर यांनी फोनवरून जिमी याला जाब विचारला असता त्याने थेट सरपंचांवर धमकी दिल्याचीच केस दाखल केली.

त्यामुळे सरपंचांना पाठिंबा देण्यासाठी स्थानिक रहिवासी पोलिस ठाण्यात दाखल झाले. ही स्मशानभूमी एसटी समाजाची असल्याचे सांगण्यात आले.