पेडणे : नाईकवाडा-तोरसे येथील रस्त्याच्या हॉटमिक्स डांबरीकरणासाठी एक वर्षांपूर्वी आमदार प्रवीण आर्लेकर यांच्या हस्ते शुभारंभ करण्यात आला होता. मात्र, अद्याप या रस्त्याच्या कामासाठी कोणतीही हालचाल न झाल्याने मिशन फॉर लोकलतर्फे श्रीफळ वाढवून शुभारंभ करण्यात आलेला दगड बँजोच्या साथीने पेडणे येथील सार्वजनिक बांधकाम खात्याच्या रस्ता विभागाच्या कार्यालयात पोहोचवून अभिनव पद्धतीने निषेध व्यक्त करण्यात आला.

मिशन फॉर लोकलचे निमंत्रक राजन कोरगावकर यांच्या नेतृत्वाखाली हा अभिनव उपक्रम राबविण्यात आला. यावेळी राजू नर्से, गजानन गडेकर, शशिकांत महाले, गजानन सावळ देसाई, रुपेश परब, रामचंद्र शिंदे, केकरे, दिगंबर नाईक, परेश वालम, पंकज पोळ आदी उपस्थित होते. यावेळी कोरगावकर यांनी सांगितले की, आमदार आर्लेकर यांनी ज्या रस्त्याचा शुभारंभ केला होता, त्या कार्यक्रमाला सार्वजनिक बांधकाम खात्याचा एकही अभियंता उपस्थित नव्हता.

तसेच, या रस्त्याचा प्रस्ताव मुख्य कार्यालयात पाठविण्यात आला असला, तरी अद्याप त्याला मान्यता मिळालेली नाही, असे सहाय्यक अभियंते गवस यांनी सांगितले आहे. दिशाभुलीचा आरोप तांबोसे-मोपा उगवेचे माजी सरपंच रुपेश परब यांनी सांगितले की, गेल्या ६ जून रोजी या रस्त्यावरील खड्डे दुरुस्त करून हॉटमिक्स डांबरीकरणाच्या कामाचा शुभारंभ मोठ्या थाटात करण्यात आला होता.

मात्र, या रस्त्याला अजूनही मंजुरी मिळालेली नसल्याचे सार्वजनिक बांधकाम खात्याच्या सहाय्यक अभियंत्यांनी सांगितले आहे. यावरून आमदार पेडणेकरांची दिशाभूल करीत असल्याचे स्पष्ट होत आहे. मात्र, पेडणेकर अशा थापांना बळी पडणार नाहीत, असे ते म्हणाले. राजू नर्से यांनी आमदारांनी पेडण्याचा विकास पाच वर्षे मागे नेल्याचा आरोप केला.