Pernem News: राज्यातील विविध ठिकाणच्या चोरींच्या घटनांमध्ये सहभाग असलेल्या तिघा चोरट्यांना पेडणे पोलिसांनी बुधवारी अटक केली. शेरीफ रेहमान एम. (वय 45 ), शाजी पी. एम. (वय 42), श्रीतु कुमार (वय 30), अशी अटक केलेल्या संशयितांची नावे आहेत. या संशयितांकडून सुमारे 13 लाखांचा मुद्देमाल जप्त करण्यात आला आहे.

पैकी शेरीफ रेहमान आणि श्रीतु कुमार हे मूळचे केरळचे रहिवासी आहेत तर शाजी पी. एम. हा मूळचा कर्नाटकचा रहिवासी आहे. पोलिसांना हे तिघे कळंगुट भागात असल्याची माहिती मिळाली होती. या तिघांच्या टोळीने अनेक चोऱ्या केल्या होत्या. पेडणेचे पोलिस निरीक्षक दत्ताराम राऊत, पोलिस उपनिरीक्षक हरिष वायंगणकर, पोलिस उपनिरीक्षक विवेक हळर्णकर यांच्या नेतृत्वाखाली विविध पथके करून या तिघांना पकडण्यात आले.

पेडणे तालुक्यात विविध ठिकाणी झालेल्या चोऱ्यांमध्ये या तिघांचा सहभाग होता. आश्वे, मांद्रे, मोरजी येथे त्यांनी चोरी केली होती. विशेषतः भारतीय पर्यटकांसह परदेशी पर्यटकांना हेरून ते चोरी करत होते. गेले दोन महिने त्यांनी घरफोड्या करत उच्छाद मांडला होता. रात्रीच्या वेळी घरफोड्या केल्याचे त्यांनी मान्य केेल आहे.

त्यांच्याकडून मोबाईल फोन, कॅमेरा लेन्सेस, वायरलेस इअरफोन्स आणि स्पीकर, मनगटी घड्याळे, अॅपलचे आयपॉड आणि एक रिट्झ कार असा एकूण 13 लाखांचा मुद्देमाल जप्त करण्यात आला आहे. या तिघांकडून आणखीही चोरींच्या घटना उघडकीस येण्याची शक्यता आहे.

पोलिस कॉन्स्टेबल प्रज्योत मयेकर, प्रेमनाथ सवालदेसाई, राजेश गावडे, जनार्दन गावकर, शबाजी राऊळ, विन्सी डायस यांचा पोलिस पथकात समावेश होता. त्यांना पेडणेचे एसडीपीओ राजेश कुमार यांचे मार्गदर्शन लाभले.