पेडणे: पेडणे गटविकास कार्यालयात मोरजी ग्रामपंचायतीचे सचिव सचिन धाउसकर यांच्यावर मूळ दिल्ली येथील पिता-पुत्राने केलेल्या हल्ल्यासंबंधी अखिल गोवा ग्रामपंचायत सचिव संघटनेच्या वतीने आज पेडणे गटविकास कार्यालयाच्या अधिकारी निक्षा नाईक तसेच पेडणे पोलिस ठाण्याचे निरीक्षक सचिन लोकरे यांच्याशी चर्चा करून दोन्ही संशयितांवर कडक कारवाई करावी, अशी मागणी करून पेडणे पोलिसांना निवेदन सादर करण्यात आले.

अखिल गोवा ग्रामपंचायत सचिव संघटनेचे अध्यक्ष शशांक गावस देसाई व सचिव गोकुळदास कुडाळकर यांच्या नेतृत्वाखाली आज राज्याच्या विविध भागातील अनेक पंचायत सचिव पेडणे येथील गटविकास कार्यालयात येऊन बीडीओ कार्यालय अधिकारी निक्षा नाईक यांची भेट घेतली व काल गटविकास कार्यालय येऊन मोरजी ग्रामपंचायतीचे पंचायत सचिव सचिन धाउ सकर यांच्यावर हल्ला करून त्यांना केलेल्या मारहाणी संबंधी खंत व्यक्त करून या घटनेचा निषेध केला.

संघटनेचे अध्यक्ष शशांक गावस देसाई म्हणाले की,या पूर्वीही पंचायत कार्यालयात असे प्रकार घडले, पण तेव्हा आमची संघटना नव्हती. आता आम्ही पंचायत सचिव संघटित आहोत पंचायत सचिवाला मारहाण करण्याचा हा प्रकार थेट पंचायतींचे मुख्य गट कार्यालय असलेल्या ठिकाणी झाला.

ही त्याहून अत्यंत गंभीर बाब आहे. अशा प्रकारे जर पंचायत सचिवावर हल्ले झाले तर सगळीकडे एक चुकीचा संदेश जाणार आहे,असेही देसाई म्हणाले.

गोकुळदास कुडाळकर,संघटनेचे सचिव

गटविकास कार्यालयात येऊन संशयित पंचायत सचिवांना मारहाण करतात, हे निंदनीय आहे. ‘दो टके का सचिव मेरा एनओसी कैसे रोक सकता है?, दो महिनेमे तेरे हाथ में सस्पेन्शन ऑर्डर दूंगा. बाहर आ तेरे को ठोक दूंगा’.ही उद्दाम भाषा हे लोक कुणाच्या जीवावर बोलतात. मुख्यमंत्र्यांनी गंभीर दखल घेऊन या अशा उद्दामांवर कठोर कारवाई करणे आवश्यक आहे.