पेडणे: गोव्यात सध्या गुन्हेगारीने डोके वर काढले असून, चोरट्यांनी आता दिवसाढवळ्या घरफोड्या करण्यास सुरुवात केली आहे. उत्तर गोव्यात पेडणे तालुक्यातील कोंडळवाडा येथे सोमवारी (दि. १४) सकाळी ११ ते १२ च्या दरम्यान एका घरात अज्ञात चोरट्यांनी हात साफ केला. या घरफोडीत सोन्याचे दागिने, रोख रक्कम आणि इतर मौल्यवान वस्तूंसह सुमारे ४.५ लाख रुपयांचा ऐवज लंपास झाल्याची माहिती मिळाली आहे.

कुटुंब घराबाहेर असताना चोरट्यांचा डल्ला

घराचे मालक म्हणाले की, ही घटना सोमवारी (१४ जुलै) सकाळी ११ ते १२ च्या सुमारास घडली, जेव्हा कुटुंबातील सर्व सदस्य घराबाहेर गेले होते. दुपारी १२ च्या सुमारास त्यांची पत्नी घरी परतल्यावर ही चोरी उघडकीस आली. घरात प्रवेश करताच त्यांना घरातील वीज चालू दिसली आणि मुख्य दरवाजाचे कुलूप कटरने तोडलेले आढळले.

या घटनेपूर्वी काही स्थानिकांनी परिसरात नंबर प्लेट नसलेल्या स्कूटरवरूनफिरणाऱ्या दोन संशयित व्यक्तींना पाहिले होते, अशी माहिती घरमालकाने दिली आहे. चोरट्यांनी घरातून एक लॅपटॉप, १.२ लाख रुपये रोख रक्कम आणि २.७५ लाख रुपये किमतीचे सोन्याचे दागिने, ज्यात दोन मंगळसूत्र आणि एक ब्रेसलेट यांचा समावेश होता, घेऊन पोबारा केल्याचा आरोप आहे.

पोलिसांकडून तपास सुरू, तरीही धास्ती कायम

घटनेची माहिती मिळताच पेडणे पोलिसांनी तात्काळ घटनास्थळी भेट देऊन पंचनामा केला. फॉरेन्सिक तज्ञ आणि श्वान पथकालाही बोलावण्यात आले होते. गुन्हेगारांचे धागेदोरे शोधण्यासाठी घटनास्थळावरून फिंगरप्रिंट्स गोळा करण्यात आले आहेत. पोलिसांनी या प्रकरणी पुढील तपास सुरू असल्याचे सांगितले आहे.