पणजी: पेडणे येथील प्रथम वर्ग न्यायिक दंडाधिकारी न्यायालयाने एका प्रलंबित फौजदारी खटल्यातील आरोपी असलेल्या जपानी नागरिक मेरिसा तामाडा यांना व्यावसायिक कारणासाठी फ्रान्सला जाण्याची परवानगी दिली आहे. १७ जून २०२६ ते ३० ऑक्टोबर २०२६ या कालावधीत त्यांना परदेश प्रवासाची मुभा देण्यात आली आहे.

मेरिसा तामाडा या गेली १९ वर्षे दरवर्षी फ्रान्समध्ये स्फटिक व दागिन्यांच्या व्यवसायासाठी जात असून त्या जपानच्या पासपोर्टधारक आहेत.

त्यांच्याविरुद्ध भारतीय दंड संहितेच्या कलम २७९ आणि ३३८ अंतर्गत गुन्हे दाखल असून संबंधित खटला न्यायालयात प्रलंबित आहे.

परदेशी नागरिक असल्याने आरोपी कायदेशीर प्रक्रियेतून दूर राहण्याची किंवा परत न येण्याची शक्यता असल्याचा युक्तिवाद सरकारी पक्षाने केला होता.

न्यायालयाने आरोपीचा पासपोर्ट, व्हिसा तसेच पूर्वीच्या परदेश प्रवासाचा इतिहास तपासल्यानंतर सरकारी पक्षाची भीती निराधार असल्याचे नमूद केले.

योग्य अटी घालून ही समस्या सोडवता येऊ शकते, असे निरीक्षण नोंदवत न्यायालयाने मेरिसा तामाडा यांना निर्धारित कालावधीसाठी फ्रान्सला जाण्याची परवानगी मंजूर केली.