Fraud In Vasco: फ्लॅट, प्लॉट विकण्याच्या बहाण्याने कोट्यवधी रुपयांना गंडा घालणाऱ्यांचे आणखी एक प्रकरण वास्कोत उघडकीस आले असून फसवणूक झालेल्यांनी या प्रकारची तक्रार वास्को पोलिसात दाखल करण्यास धाव घेतली आहे.

सात आठ महिन्यांपूर्वी गरजू लोकांकडून लाखो रुपये गोळा करून फ्लॅटमध्ये विनाभाडे रहा असे सांगून गंडा घातलेल्या नूर अहमद नंतर आता अशाप्रकारचे फ्लॅट देण्याच्या बहाण्याने गंडविलेल्या लोकांनी वास्को पोलिस स्थानकात धाव घेऊन चार ठकसेनांविरुध्द तक्रार दाखल केली आहे. याप्रकरणी मोठे रॅकेट असल्याचा दावा फसवणूक झालेल्या लोकांनी केला आहे.

फसवणुकीचे आणखी एक प्रकरण उघड

उपासनगर येथे हाउसिंग काॅलनीत फ्लॅट देतो, तसेच प्लॅाट देतो असे सांगून अनेकांना 1 कोटी रुपयांना गंडा घातल्याचे प्रकरण उघड झाले आहे. तक्रारदाराकडून 5 लाख रुपयांचा धनादेश, एक लाख रुपये आगाऊ रक्कम गोळा करून कोट्यवधी रुपयांना गंडा ठकसेनांनी घातला.

आपण गंडावले गेल्याचे कळताच काल त्यांनी वास्को पोलिस स्थानकात धाव घेऊन तक्रार दाखल केली आहे. सात आठ महिन्यांनंतर वास्कोत घडलेले हे फसवणुकीचे आणखी एक प्रकरण आहे.