MLA Jeet Arolkar: पेडणे तालुक्यासाठी प्रादेशिक विकास आराखडा असताना जमीन रूपांतर आराखडा का असा प्रश्न करत हा आराखडा मागे घ्यावा यासाठी आमदार जीत आरोलकर यांच्या नेतृत्वाखाली पेडणे विकास अभियानाने मुख्यमंत्र्यांची भेट घेऊन निवेदन सादर केले.

सोमवारपर्यंत हा मसुदा मागे न घेतल्यास संपूर्ण तालुक्यात ‘रास्ता रोको’ आंदोलन केले जाईल, असा यावेळी देण्यात आला.

आमदार आरोलकर यांनी स्थानिक पंचायतींच्या सरपंचांसह शुक्रवारी मुख्यमंत्री डॉ. प्रमोद सावंत यांची मंत्रालयात भेट घेऊन हा आराखडा रद्द करण्याची मागणी केली. यावेळी आरोलकर म्हणाले जमीन रुपांतरणाचा आराखडा करताना स्थानिक लोकप्रतिनिधी तसेच पंचायतींना विश्वासात घेणे आवश्यक होते.

मात्र, याबाबत तसे झालेले नाही. आम्हालाही विकास हवा आहे. मात्र, तो करताना स्थानिकांना विश्वासात घ्यायला हवे. आराखडा बनवताना सार्वजनिक वापरावयाच्या जागा, मच्छीमार, धार्मिक स्थळे, स्मशानभूमी असे विविध झोन करणे आवश्यक आहे. मात्र, याचा विचार न करताच आराखडा तयार करण्यात आला आहे. मुख्यमंत्र्यांनी याबाबत सोमवारपर्यंत मंत्र्यांसोबत चर्चा करून निर्णय घेऊ, असे आश्वासन दिले आहे. मात्र हा मसुदा मागे न घेतल्यास मंगळवारनंतर आम्ही ‘पेडणे बचाव अभियान’ सुरू करणार आहोत, असे आरोलकर म्हणाले.

चर्चा करून निर्णय : सावंत

या जमीन रूपांतर आराखड्याबाबत नगरनियोजन मंत्र्यांशी चर्चा करून योग्य तो लोकहिताचा निर्णय घेतला जाईल. या आराखड्याचा मसुदा जाहीर झाला आहे. त्याला आक्षेप नोंदवता येतात आणि सूचना मांडता येतात. त्यांनी त्या मांडाव्यात. हा मसुदा पेडणे तालुक्यातील पंचायतींत उपलब्ध करून देण्यास नगर नियोजन मंत्र्यांना सांगितले आहे. सर्वांचा विचार करून निर्णय घेवू, असे मुख्यमंत्री डॉ. प्रमोद सावंत म्हणाले.