पणजी: मेरशी येथील हॉलिडे इन गेस्ट हाऊसजवळ पादचारी शंकर सिंग (३३ वर्षे) याला ट्रकने धडक दिल्याने त्याचा जागीच मृत्यू झाला. अपघातानंतर ट्रक घेऊन पसार झालेल्या चालक धुळाप्पा पुजारी याला जुने गोवे पोलिसांनी त्याचा शोध घेऊन मेरशी सर्कल येथे अटक केली.

(Pedestrian killed in truck collision in merces)

ही घटना आज (गुरूवारी) सकाळी साडेआठच्या सुमारास घडली. पोलिसांनी दिलेल्या माहितीनुसार पादचारी शंकर सिंग हा मेरशीच्या दिशेने जात होता.मागून भरधाव आलेल्या ट्रकने पादचाऱ्याला धडक दिल्याने तो फेकला गेला.

डोक्याला जबर मार लागल्याने त्याचा जागीच मृत्यू झाला. सकाळची वेळ असल्याने रस्त्यावर रहदारी नव्हती त्याचा फायदा घेत चालकाने ट्रक न थांबवता भीतीने तेथून पळ काढला. एका व्यक्तीने या ट्रकचा क्रमांक टिपून तो पोलिसांना दिला होता. या क्रमाकांच्या आधारे पोलिसांनी ट्रकचा शोध घेऊन चार तासात छडा लावला.