Goa Farmer: शेतकऱ्यांनी नव्या ऊस तोडणीला प्रारंभ केला असून तोडला जाणारा ऊस ठेकेदाराकरवी परराज्यात पाठविला जात आहे. असे असताना सरकारने गेल्या वर्षीची ऊस रक्कम प्रतिमेट्रिक टन रु. 560/-अद्याप चुकती न केल्यामुळे आधीच शेतकऱ्यांची कोंडी झाली आहे. त्यामुळे ही रक्कम लवकर परत मिळावी अशी मागणी होत आहे.

सरकार शिल्लक रक्कम देण्यास टाळाटाळ करीत असल्याची खंत शेतकरी व्यक्त करीत आहेत. 80% रक्कम सहा महिन्यांपूर्वी देण्यात आली होती; पण शिल्लक 20% रक्कम देण्यात आलेली नाही. यंदाही संजीवनी साखर कारखाना सुरू होण्याच्या हालचाली दिसून येत नाहीत. त्यामुळे चिंतेचे वातावरण आहे.

सांगेतील प्रगतशील ऊस उत्पादक संजय कुर्डीकर म्हणाले, सरकार आता तीन वर्षांनंतर साखर कारखाना बंद करून इथेनॉल उत्पादन घेऊ पाहात आहे. आज संजीवनीच्या प्रशासकीय कारभाराला कंटाळून अनेक शेतकरी ऊस उत्पादनापासून लांब गेले. आता कितीही प्रयत्न केले तरी ऊस उत्पादन कमी पडणार असून इथेनॉल उत्पादन हे गोव्यातील शेतकऱ्यांसाठी नसून पर राज्यातील शेतकऱ्यांना वरदान ठरेल.

आवश्‍यक गोष्टींची पडताळणी करा

सरकारने आता शेतकऱ्यांची बैठक घेऊन इथेनॉल उत्पादन घेण्यासाठी ऊस पिकाची किती आवश्यकता आहे आणि परत ऊस उत्पादन घेण्याची किती शेतकऱ्यांची मानसिकता आहे याची पडताळणी करावी. जेणेकरून पुढील हंगामात ऊस लागवड करण्यासाठी शेतकरी आतापासून तयारी करू शकतील, असे कुर्डीकर यांनी स्पष्ट केले.