पणजी: पणजीतील पाटो (सेसा घर) ते रुआ द ऑरेम दरम्यानच्या पदपथ व पादचारी पुलावरील सुरक्षेच्या अभावाची गंभीर दखल गोवा मानवाधिकार आयोगाने घेतली आहे. या मार्गावर तातडीने सीसीटीव्ही कॅमेरे बसवावेत, पथदिवे सुरू करावेत आणि २४ तास पोलिस गस्त ठेवावी, असे निर्देश आयोगाने संबंधित विभागांना दिले आहेत.

आयोगाचे अध्यक्ष न्यायमूर्ती भारत देशपांडे, सदस्य डेस्मंड डिकॉस्टा आणि प्रमोद कामत यांच्या खंडपीठाने चौकशी अहवालात या सूचना केल्या आहेत. पणजीतील रहिवासी निवेदिता आर. यांनी २० जुलै २०२६ रोजी दाखल केलेल्या तक्रारीच्या आधारे आयोगाने ही कारवाई केली.

इमेजिन पणजी स्मार्ट सिटी मिशन लिमिटेडच्या व्यवस्थापकीय संचालकांनी पाटो ते रुआ द ऑरेम मार्गावर तातडीने सीसीटीव्ही सुरक्षा कॅमेरे बसवावेत, तर वीज खात्याच्या मुख्य अभियंत्यांनी पादचारी पूल आणि मार्गावरील पथदिवे सुरू करावेत, असे निर्देश देण्यात आले आहेत.

सीसीटीव्ही व पथदिव्यांच्या अभावामुळे हा परिसर ‘ब्लाइंड स्पॉट’ बनला आहे. येथे विनयभंग आणि लैंगिक अत्याचाराच्या घटना घडल्याचे नमूद करण्यात आले असून, यासंदर्भात एफआयआरही नोंदवण्यात आले आहेत.

महिला, बालके आणि सामान्य नागरिकांच्या सुरक्षिततेला यामुळे धोका निर्माण झाला असल्याचे आयोगाने निरीक्षण नोंदवले. संबंधित विभागांनी २७ ऑक्टोबर २०२६ पर्यंत केलेल्या किंवा प्रस्तावित कारवाईचा अहवाल सादर करावा, असे निर्देशही देण्यात आले आहेत.