पेडणे : गोव्यात आणखी एक मृतदेह कुजलेल्या अवस्थेत सापडला आहे. पेडणे तालुक्यातील हरमल परिसरात एका गेस्ट हाऊसमध्ये एका महिलेच्या मृतदेह सापडला असून याप्रकरणी पेडणे पोलिसांनी बांदा येथील एका संशयिताला अटक केली आहे. महत्त्वाची बाब म्हणजे मृत महिला सावंतवाडी भागातील असल्याचीही माहिती मिळाली आहे.

हरमल खालचावाडा परिसरातील एका गेस्ट हाऊसमध्ये सोमवारी सकाळी एका महिलेच्या मृतदेह कुजलेल्या अवस्थेत सापडला. महिलेचा मृतदेह हा अर्धवट कुजलेल्या अवस्थेत होता. त्यामुळे महिलेचा मृतदेह नेमका कशामुळे झाला हे उत्तरीय तपासणीनंतर समजणार आहे. मात्र पोलिसांनी याप्रकरणी बांदा येथील एका व्यक्तीला हत्येच्या संशयातून अटक केली आहे.

मृत महिलेचं नाव श्रेया माडखोलकर असून सोमवारी दुपारी 2 वाजण्याच्या सुमारास रुमबॉयला खोलीतून कुजल्याचा वास आला. याची माहिती रुमबॉयने लगेच मालकाला दिली. मालकाने पेडणे पोलिसांना पाचारण करुन खोली उघडली आणि त्याचठिकाणी जमिनीवर महिलेचा अर्धवट कुजलेला मृतदेह पोलिसांना आढळून आला. महिलेने उंदिर मारण्याचं औषध घेतल्याचा संशय पोलिसांनी व्यक्त केला आहे.

पेडणे पोलिसांनी मृतदेहाचा पंचनामा करुन मृतदेह गोमेकॉच्या रुग्णालयात पाठवून दिला आहे. दरम्यान मृत महिला ही अटकेतील संशयिताच्या मित्राची पत्नी असल्याची माहिती आहे. तसंच प्रेमसंबंधातून ही हत्या झाल्याचा संशयही पोलिसांना आहे.